Украины ерөнхийлөгч Зеленский өчигдөр /2023.04.05/ Польш улсад айлчиллаа. Тэрбээр сүүлийн үед АНУ болон Их Британид айлчлах замаараа Польшоор дайран өнгөрсөн боловч энэ удаад зориуд Варшавыг зорьж, албан айлчлал хийж байна.

Сүүлийн үеийн Зеленскийн айлчлалуудыг харвал ихэвчлэн гэнэт зарлаж, өндөр нууцлал, хамгаалалт дор аялдаг байсан. Энэ удаад тэр эхнэрийнхээ хамтаар бүтэн цагийн хуваарьтай албан айлчлал хийж буйгаараа онцлог.

Айлчлалын үеэр Зеленскийд Польшийн өндөр дээд шагнал болох Цагаан бүргэд одонг гардуулав. Польшийн ерөнхийлөгч Анджей Дуда шагналыг гардуулах үеэрээ Зеленскийг онцгой нэгэн гэж хэлжээ. "Володимир та бол онцгой хүн. Ард түмнээсээ мандат авсны дараа та гэнэт л хэний ч таамаглаагүй онцгой даалгаварт дуудагдсан. Жилийн өмнө Украинд юу тохиолдохыг, танд юу тохиолдохыг бидний хэн нь ч мэдэхгүй байсан. Таны өнөөгийн байр суурийг харвал Украиныг Оросын түрэмгийллээс аварч чадна гэдэг эргэлзээгүй байна" гэж тэр хэлсэн байна.

"Та бүхэн Украиныг орхилгүй мөр зэрэгцэн зогссонд бид талархаж байна. Энэ бол түүхэн харилцаа гэж бид үзэж байна. Сая сая украин хүнийг хоргодох байраар хангаж, өөрийн гэртээ байгаа мэт тэднийг тухлуулсан та бүхэнд баярлалаа. Бидэнд тусламж хамгийн их хэрэгтэй байсан дайны эхэн үеийн тэр өдрүүдэд энэ бүхнийг хийсэнд тань талархаж байна" гэж Зеленский Польшийн ерөнхийлөгч Анджей Дудад хэлэв.

Хоёр удирдагчийн найрамдалт харилцааг харвал дайн дажинтай цагт Украин, Польшийн харилцаа хэр зузаарсан нь илт байна. Польш улс дайн эхэлснээс хойш Украины талд тууштай зогсон, сая гаруй дүрвэгчийг хүлээн авсан. Мөн Украин руу илүү их зэвсэг, тусламж илгээхийг НАТО-ийн холбоотнуудаас шаардсаар ирсэн.

Польш улс өнгөрсөн сард Украинд дөрвөн МиГ-29 онгоц илгээсэн. Нийтдээ 14 онгоц илгээхээ айлчлалын үеэр Анджей Дуда мэдэгджээ. Түүнчлэн Их Британи, Герман тэргүүтэй барууны орнууд өнгөрсөн долоо хоногт Украинд анхны танкуудаа илгээсэн билээ.

Эх сурвалж: CNN