Ардчилсан Залуучуудын Холбооноос Д.Монголхүүг цагдан хорьсонтой холбогдуулан МУ-ын Ерөнхийлөгч У.Хурэлсүх, АН-аас дэвшиж УИХ-д сонгогдсон нэр бүхий 11 гишүүнд өнөөдөр /2023.04.04/ шаардлага хүргүүлж,  иргэдийн дунд нээлттэй микрофон ажиллууллаа.

Энэ үеэр Ардчилсан Залуучуудын Холбооны тэргүүн Н.Ганболд байр сууриа илэрхийлэхдээ “Үндсэн хуулиар тунхагласан иргэдийн үг хэлэх, үзэл бодлоо чөлөөтэй илэрхийлэх эрхэнд төр засаг, хууль сахиулах байгууллагын албан тушаалтнууд халдах явдал газар авч Монгол Улсад ардчиллын үнэ цэн алдагдаж байна. Эрх баригчид бодит үнэнийг хэлж, шүүмжилсэн, тайван жагсаал, цуглаан хийсэн залуусыг шүүх, цагдаагийн байгууллагад гомдол гаргах, удаан хугацаанд шалгуулж, сэтгэл, санаа, эрүүл мэндэд нь дарамт учруулж, ил далд хэлбэрээр эрүүдэн шүүх, барьж хорих явдал сүүлийн жилүүдэд эрс нэмэгдэж байна.

Тиймээс өнөөдөр “Эрх чөлөө” сэдвийн дор нээлттэй микрофон ажиллууллаа. Мөн Монгол Улсын Ерөнхийлөгч У.Хүрэлсүх, АН-аас нэр дэвшиж УИХ-д сонгогдсон 11 гишүүнд шаардлага хүргүүлхээр бэлдээд байна” гэв.

Ардчилсан Залуучууд Холбооны дэд тэргүүн Г. Ганхөлөг:

-Эрх баригчид маш айдастай байна. Иргэд ямар нэгэн хулгайн хэргийн талаар ярихад эрх баригчид тэр хулгайг хийчихсэн байдаг. Тиймээс “Айсан хүнд аргал хөдөлөнө” гэгчээр өөрийнх нь хулгайг ярьж байна гэж айгаад үг хэлж, үзэл бодлоо илэрхийлсэн иргэдийг шоронд хорьдог. Өнгөрсөн тав дахь өдөр Шадар сайд С.Амарсайханы гомдлоор Dens.mn сайтын эрхлэгч Т.Шинэбаярт холбоотой шүүх хурал болсон. Өчигдөр Д.Монголхүүг хорьсон. Өнөөдөр Д.Мөнх-Эрдэнийг шүүх хурал болж байна.  Иргэдээ хорьж дуусчихаад цагдаагийн бага цолтноос эхлээд хорьж эхэлнэ. Эрх баригчид  донтой бас айдастай байна.  Монголд, цахим үндэстэн биш цахим гав ажиллагаа эрчээ авлаа. Тэд цхим гаваа зүүх гээд иргэдээ отож байна. Тэгсэн ч бид үг хэлж, үзэл бодлоо илэрхийлсээр байх болно.  Дарангуйлал руу нэвт ороход ойрхон байгаа учраас иргэд сонор сэрэмжтэй байгаарай.

Э.Хулан