Тусгай хамгаалалттай газар эзэмшдэг "ТУСГАЙ ЭРХТЭЙ" эрхмүүд

Засгийн газраас хэрэгжүүлж буй "5Ш" ажиллагааны нэг нь Шилэн ажиллагаа. Үүний хүрээнд Тусгай хамгаалалттай газрын мэдээллийг олон нийтэд ил тод болгоод байна. Өнөөдрийн байдлаар нийт 2162 зөвшөөрөл бүртгэлтэй байгаа аж. Тэр дунд эрх мэдэлтэй, олны танил эрхэм, өндөр албан тушаалтан ч цөөнгүй байгаа нь олны бухимдлыг төрүүлэв. Салбар яамнаас 2016 онд хамгийн их га газар буюу 82.72 га тусгай хамгаалалттай газрыг олгожээ. Дараагаар нь 2015 онд 40.06 га газар, 2011 онд 38.36 га газар олгосон байх юм.

Н.ЦЭЛМҮҮН ТҮРГЭНИЙ АМАНД 22.83 ГА ГАЗАР ЭЗЭМШДЭГ

Shilen.gov.mn сайтад ил болгосноор төрийн тусгай хамгаалалттай газар эзэмшигчдийн жагсаалтын эхэнд Н.Цэлмүүн бичигджээ. Тэрбээр Богд уулын дархан цаазат газарт Түргэний аманд буюу олны нэрлэж заншснаар Кувейтын аманд 2011 онд 22.83 га газар эзэмшиж эхэлжээ. Одоо 12 жил болж буй.

Н.Цэлмүүнийг Кувейтын аманд газар эзэмших эрхийг авахад Байгаль орчны сайдаар Л.Гансүх ажиллаж байсан талаар зарим эх сурвалж мэдээлжээ.

Н.ЖАНЦАННОРОВ ХҮРЭЛТОГООТЫН АМАНД 0.523 ГА ГАЗАРТАЙ

Монгол Улсын Хөдөлмөрийн баатар, Ардын жүжигчин, Төрийн хошой шагналт хөгжмийн зохиолч Нацагийн Жанцанноров нь 2008 онд Хүрэлтогоотын аманд 0.523 га газар эзэмшжээ.

Тэрбээр саяхан Монгол Улсын урлаг судлалын Шинжлэх ухааны доктор цол хүртсэн бөгөөд 2022 онд Монгол Улсын Консерваторийн профессор цол хүртсэн юм. Н.Жанцанноров нь 1989 онд "Мандухай цэцэн хатан" киноны хөгжмөөр, 2000 онд Морин хуурт зориулсан шилдэг бүтээлүүдээрээ "Төрийн шагнал"-ыг хоёр удаа, 2005 онд "Ардын жүжигчин" цолоо хүртсэн.

Н.БАГАБАНДИ ЗАЛААТЫН АМАНД 0.518 ГА ГАЗАР ЭЗЭМШДЭГ

Нацагийн Багабанди нь Монголын улс төрийн зүтгэлтэн, Монгол улсын хоёр дахь ерөнхийлөгч юм. Тэрбээр 2010 – 2013 онд "Оюу толгой" ХХК-ийн Төлөөлөн удирдах зөвлөлийн анхны гишүүнээр ажиллаж байсан бөгөөд 2016 оны есдүгээр сард "Оюу толгой" ХХК-ийн ТУЗ-д дахин томилогдсон байна. Тэгвэл тэрбээр Залаатын аманд 2018 онд 0.518 га газар эзэмшдэг байна.

Н. Багабанди 1987 онд философийн ухааны дэд доктор эрдмийн зэргийг дүүргэж Украйн, Казахстан, Турк, Япон, АНУ зэрэг улсуудын нэр хүндтэй их дээд сургуулиудаас хүндэт доктор цол хүртсэн юм. 1992-1996 онд УИХ-ын гишүүн, УИХ-ын дарга, 1996-1997 онд УИХ-ын гишүүн, УИХ дахь МАХН-ын бүлгийн дарга, 1997-2005 онд Монгол Улсын Ерөнхийлөгчөөр ажилласан бөгөөд олон төрлийн ном зохиол, эрдмийн ажлууд туурвисан эрдэмтэн улс төрийн зүтгэлтэн юм.

"ЭНСАДА ХОЛДИНГ" КОМПАНИЙН ЗАХИРАЛ Ө.БОЛДСАЙХАН ХӨВСГӨЛД 14 ГА ГАЗАРТАЙ

"Энсада Холдинг" компанийн захирал Ө.Болдсайхан нь 2016 оноос Хөвсгөл аймгийн байгалийн үзэсгэлэнт тусгай хамгаалалтын газар болох Алагцарын голын зүүн эрэг дээр 11 га газар, Алагцарын голын элсний ард гурван га газар эзэмшдэг байна. Түүнийг Хөвсгөл аймагт төдийгүй Монгол Улсад газар тариалангийн чиглэлээр их ажил хийсэн хүн гэж нутгийнхан нь ярьцгаадаг. Тэр утгаараа шилдэг бизнесменээр шалгарч байсан удаатай.

Тэрбээр 2016 онд “Рио-2016” зуны паралимпийн пауэрлифтингийн эрэгтэйчүүдийн 88кг-д өрсөлдөж, хүрэл медаль хүртсэн Э.Содномпилжээд хоёр өрөө байр бэлэглэж байсан.

А.СҮРЭН