Хөвсгөл аймгийн сурагч Чинхүүгийн Заяамандах Сингапур улсад зохион байгуулсан олон улсын шорттрекийн тэмцээнээс алтан медаль хүртжээ. Тэрбээр Улаан-Уул сумын ерөнхий боловсролын сургуулийн дөрөвдүгээр ангийн сурагч бөгөөд анх долоон наснаасаа тэшүүрийн спортоор хичээллэж эхэлсэн байна.

Бяцхан тэшүүрчин хүүгийн ээж Б.Чаминчимэгтэй утсаар холбогдсон юм. Тэрбээр "Манай хүү одоо 10 настай. Тэшүүрээр хичээллээд хоёр жил болж байна. Анх өөрөө сонирхлоороо энэ спортоор хичээллэсэн. Хүүтэйгээ өчигдөр холбогдсон. Зочид буудлынхаа интернэтийн сүлжээгээр холбогдож ярьсан. Хүү маань өмнөх өдөр нь 500 метрийн зайд уралдаж, дөрөвдүгээр байр эзэлсэн юм. Тэгээд "Би жаахан хичээсэн бол медаль авах байлаа.

Уг олон улсын  тэмцээнээс 2024 олимпод оролцох эрхээ авсан. Тэр болтол бэлтгэлээ сайн хийж, амжилт гаргахыг хичээх болно. Хүү маань өнгөрсөн жил анх удаа аймгийн аварга шалгаруулах тэмцээнд оролцож, алтан медаль хүртсэн. Дараагаар нь Улсын аварга шалгаруулах  тэмцээнээс гурван алт, 200 болон 300 метрийн рекордыг эвдэж, Монгол Улсын рекордыг эзэмшиж байгаа. Аав нь тэшүүрийн спортын мастер цолтой. Сумынхаа сургуульд багшилдаг. Аавынхаа залгамж халааг үргэлжлүүлж явна" гэв.

Сурагч Ч.Заяамандах нь өнгөрсөн онд улсын аварга шалгаруулах тэмцээний 100, 300 метрийн зайд хоёр алт, 100, 300 метрийн зайд рекорд эзэмшигч, аймгийн аварга шалгаруулах тэшүүрийн тэмцээнд 100, 300 метрийн зайд хоёр алт хүртэж Улаан-Уул сумын “Өв тэгш” сурагчаар шалгарсан байна. Мөн энэ онд Эрдэнэт, Булганы аймгийн аварга шалгаруулах тэшүүрийн тэмцээний 300 метрийн зайд мөнгө, Хөвсгөл аймгийн аварга шалгаруулах тэмцээний 100 метрийн зайд алтан медаль, “Хөх сувд-2023” мөсний баярын үеэр болсон тэшүүрийн тэмцээнд хүрэл медаль, Хүүхдийн спортын долдугаар их наадмын тэшүүрийн тэмцээнд 12 насны ангилалд өрсөлдөж, 300 метрийн зайд мөнгөн медаль тус тус хүртсэн байна.