3,417.49
Хонь
Хэнд ч хэлмээргүй, зөвхөн өөртөө л хадгалмаар тийм нууцууд танд байдаг бололтой. Тэдгээр нууц энэ долоо хоногт санааг тань зовооно. Зориуд нуун дарагдуулснаасаа болж асуудалд орооцолдох магадлалтай байгаа тул шулуун шударга байхыг зөвлөе. Ганц бие хүмүүс таалагддаг хүнтэйгээ холбоо тогтоох боломжтой болно. Боломжийг бүү алдаарай. Харин та хостой бол хайртай хүнээ уурлуулж, сэтгэл ханамжгүй байлгахаас болгоомжлоорой. Ажлын ачаалал хэвийн байна. Гэхдээ хувийн асуудлаа ажил хэрэгтэй хутгахгүй байхыг зөвлөе. Хэт их сэтгэл хөдлөлөөсөө болж ажлын байран дээрээ асуудалд орж магадгүй. Санхүүгийн байдал тогтвортой байна. Гэхдээ мөнгө байгаагийн хэрээр үрж, ажлаа цалгардуулахгүйг хичээгээрэй.
Үхэр
Энэ долоо хоногт сэтгэл хөдлөлөө хянаж, ажил, амьдралын харилцаагаа тохируулахыг зөвлөж байна. Та маш завгүй байх учир бэрхшээлийг давах гол түлхүүр нь нарийн төлөвлөгөө гэдгийг сана. Ганц бие хүмүүс шийдвэр гаргаж чадахгүй тээнэгэлзэнэ. Ойр дотны хүмүүсээсээ тусламж хүсэхэд гэмгүй. Харин та хостой бол хайртай хүнийхээ өнгөрсөн баларсанг ухаж төнхөөд хэрэггүй. Дэмий сониуч зангаас тань болж харилцаандаа сэв суулгах эрсдэлтэй байна. Ажил дээр дарамт шахалтгүй тайван байна. Ажил хайж байгаа бол гэрээ байгуулахдаа анхааралтай байгаарай. Хууртагдаж, мөнгөө алдах эрсдэлтэй байна. Санхүүгийн алдагдлаас сэргийлэхийн тулд зарцуулалтдаа хяналт тавь. Зарцуулалтаа өөрчлөх цаг чинь ерөнхийдөө болжээ.
Ихэр
Энэ долоо хоногт сэтгэл санаа өөдрөг байна. Энэ нь таныг ажил төрөл, санхүүгийн байдалд ч сайнаар нөлөөлнө. Гэхдээ хүмүүстэй харилцахдаа сэтгэл хөдлөлөө хэтрүүлэхээс зайлсхий. Ганц бие хүмүүс шинэ харилцаа үүсгэнэ, болзооны санал хүлээж авна. Бурхан танд боломж олгож байхад гоочилж байгаад аль ч үгүй хоцров оо. Ажил дээр шинэ үүрэг хариуцлага нэмэгдэж, туйлын завгүй болно. Ажил хайж буй хүмүүс хожим нь туршлага болохуйц хэд хэдэн ярилцлагад уригдана. Нэмэлт орлого олох боломж гарна. Олсон мөнгөө үрэх ч завгүй өдрүүд таныг хүлээж байна. Амьдралд тань зарим нэг гэнэтийн өөрчлөлт гарна. Үүнийг стресстэлгүй хүлээж аваарай.
Мэлхий
Дотроо сайн сайхан зүйлийг хэчнээн бодсон ч гаднаа үйлдлээрээ хэрэгжүүлэхгүй бол нэмэргүй. Амьдрал тань өрсөлдөөнөөр дүүрэн байна. Залхууралгүй, идэвхтэй байхгүй бол өрсөлдөөн улам ширүүсэх хандлагатай байна. Ганц бие хүмүүс сэтгэл санааны өөрчлөлтөөс үүдэлтэйгээр тавгүйтэнэ. Хайртай хүнийхээ өнгөрсөн амьдралыг сониучирхах нь хэн хэнийг тань эвгүй байдалд оруулна. Хол байгаа хайртдаа урам хугарч магадгүй. Ажлын уур амьсгал уйтгартай байна. Хэрвээ та ажил хайж буй бол ур чадвараа сайжруулахад анхаар. Мөнгөний хэрэгцээ нэмэгдэж, арга зам хайна. Найзтайгаа хамтарч ямар нэг зүйл эхлүүлэхээр төлөвлөж магадгүй. Гэхдээ хожим харамсахгүйн тулд шийдвэр гаргахаасаа өмнө сайтар бодоорой.
Арслан
Арслангийн ордныхон олон нийттэй харилцах ур чадвар сайтай, энэ нь байнга сайжирч байдаг. Энэ долоо хоногт ч бас ур чадвараа ашиглан ашигтай хүмүүстэй харилцаа тогтооно. Ирэх өдрүүдэд аз авчрах зарим чухал үйл явдалд оролцоно. Ганц бие хүмүүс хосоо олох магадлалтай байна. Харин та хостой бол хайртай хүнээ хэт өмчлөх гээд байна уу гэдгээ анзаараарай. Хайртай хүнийхээ асуудалд хэт их оролцох хэрэггүй. Ажил дээр удирдлагууд тань таныг хүлээн зөвшөөрнө. Хурал, уулзалтууд дээр шаргуу хөдөлмөрийг тань магтана. Ажил хайж байгаа хүмүүс амьдралаа эрс өөрчлөх сонголт хийнэ. Санаанд оромгүй олон орлогын эх үүсвэртэй болно. Гэртээ тавилга худалдаж авч магадгүй.
Охин
Засах шаардлагатай зарим нэг зан чанар танд байна. Аливаа юманд байнга шалтаг олох бол зөвхөн тухайн нөхцөл байдлаас гарах ядмагхан арга гэдгийг сана. Үүний оронд үнэнийг хүлээн зөвшөөрч, өөрийн үүрэг хариуцлагаа ухамсарла. Ганц бие хүмүүст хайр дурлал хайж явах сонирхол алга байна. Харин хостой хүмүүс гэрийн ажил гэх мэт онц ач холбогдолгүй зүйлээс болж хайртай хүнтэйгээ маргалдаж магадгүй. Ажлыг цагийг нарийн баримтал. Шинэ ажил хайхын оронд хийж дадсан зүйлээ хэсэг хийсэн нь дээр ч байж магадгүй юм. Мэргэжлээ солино гэдэг таны бодож байгаа шиг тийм ч хялбар биш. Хөрөнгө оруулалтын ашиг орж ирнэ. Гэхдээ бусдад санхүүгийн зөвлөгөө өгч мэдэмхийрэх хэрэггүй.
Жинлүүр
Шийдвэр гаргахгүй хэт их эргэлзэх хэрэггүй. Хэдий чинээ эргэлзэнэ, төдий чинээ бүтэлгүйтэх магадлалтай. Шийдэмгий байдал танд аз дагуулдаг юм байна. Ганц бие хүмүүс яаран шийдвэр гаргах хэрэггүй. Түр зуурын хамтрагч танд хэрэггүй учир хүлээхэд бэлэн байна. Хосууд ач холбогдолгүй зүйлээс болж тэвчээр алдран бие биедээ уурлана. Эцсийг нь үзэж чадахгүй ажлаа бүү хүлээж ав. Хэн ч таныг заавал хий гэж албадаагүй. Та авъяас чадвараа харуулахыг эрмэлздэг байж болох ч яаралгүйгээр, нарийн төлөвлөгөөтэй хөдлөхийг зөвлөж байна. Санхүүгийн талбарт хүнд сорилтууд тулгарна. Хуучинсаг үзэл, хоосон итгэл үнэмшилээсээ салах цаг чинь болжээ. Юу ч болж бүтэхгүй байвал зүгээр л унтаад өг.
Хилэнц
Харилцааны ур чадварынхаа ачаар удирдлагуудтайгаа ойлголцож, ажил дээрээ азтай байна. Хамтран ажиллагсадтайгаа үл ойлголцохоос болгоомжил. Ганц бие хүмүүс өөрөөсөө ахмад юм уу ойр дотны хэн нэгэнд дурлах магадлалтай байна. Харин та хостой бол хамтдаа аль болох олон цагийг өнгөрөө. Аяла. Хэрвээ та ажил хайж байгаа бол юм сурч авахын тулд бага цалинтай ч хамаагүй ажилд орохыг зөвлөж байна. Энэ долоо хоногт хэдий чинээ шаргуу ажиллана төдий чинээ орлого олно. Бэрхшээлээс айдаг, ядрахаас халгадаг бол олон сайхан боломжоо алдахаар байна. Эерэг энергитэй, зөв хүмүүсээр өөрийгөө хүрээлүүл. Учир нь энэ долоо хоногт та бусдын нөлөөнд амархан автах шинжтэй байна.
Нум
Энэ долоо хоногт сайн сонсогч байхыг танд зөвлөж байна. Бусдыг сонсож, өөрийгөө хүний оронд тавьж үзэж байж л тэднийг ойлгоно. Ганц бие хүмүүс бусдын хайр дурлалд атаархана. Гэхдээ хүний амьдралд хөндлөнгөөс оролцоод хэрэггүй. Хайртай хүндээ хэлж зүрхэлдэггүй зүйлс танд олон байдаг бололтой. Дэмий өөрийгөө түгшээж байхаар ярилцаж ойлголцох гээд үзээрэй. Ажил дээр сайхан зүйлс тохиолдож, уур амьсгал эерэг байна. Санхүүгийн байдал сайжрах төлөвтэй байна. Хэрвээ та удирдах албан тушаалтан бол доод хүмүүсээ зөв чиглүүлж, хэлснээсээ буцдаггүй байгаарай. Та хэдий чинээ сахилга баттай байна төдий чинээ аз ивээнэ. Сэтгэл хөдлөлөө хэт их хянаж, хүйтэн хөндий байсны хэрэггүй.
Матар
Шинэ зүйлийг хурдан хүлээн зөвшөөрч, өөртөө уусгаж авч чаддагийнхаа ачаар та бусдаас нэг алхмын өмнө амжилтад хүрнэ. Энэ долоо хоногт матруудын амьдрал маш сонирхолтой байх болно. Амьдралд тань шинэ зүйл гарч ирж тайван байдал алдагдах боловч та эрч хүчтэй байна. Ганц бие хүмүүс хамгийн тохиромжтой хүнээ олох магадлалтай байна. Харин та хостой бол болоогүй зүйлд санаа зовох хэрэггүй. Оронд нь өнөөдрөөрөө байж, цаг мөч бүрийг мэдэр. Хайртай хүнтэйгээ хамтдаа цагийг сайхан өнгөрөө. Удирдлагын өгсөн үүрэг даалгаврыг биелүүлэхэд хэцүү байх ч таны хичээл зүтгэл үнэлэгдэнэ. Хийх дуртай зүйлээрээ дамжуулан мөнгө олох боломж гарна. Шинэ бизнес эхлүүлэхээр төлөвлөж буй бол сууриа анхнаас нь зөв тавихыг зөвлөж байна.
Хумх
Энэ долоо хоногт таны сэтгэл санаа өөдрөг, үйлс бүтэмжтэй байна. Бэрхшээл тулгарсан үед эерэг хандлагатай байхын тулд дуртай зүйлээ хий. Ганц бие хумхын ордныхон өмнөх харилцаанаасаа бүрэн салж чадахгүй байгаа бололтой. Үүнээсээ болоод та шинэ харилцаанд нээлттэй байж чаддаггүй. Хэрвээ танд олон сонголт байгаа бол үүнээс болоод хэрүүл маргаан үүсч магадгүй. Та заримдаа үгүй гэж хэлж чаддаггүйгээсээ болоод даахгүй нохой булуу хураахын үлгэр болдог юм байна. Тиймээс өөрийн чадах зүйлдээ л амлалт өг. Ажил хайж байгаа хүмүүс төдийлөн азтай бус байна. Гэхдээ олон байгууллага танд татгалзлаа гээд энэ нь ертөнцийн төгсгөл биш гэдгийг санаарай. Зүгээр л танд зориулсан онцгой боломж хараахан гарч ирээгүй байна гэсэн үг.
Загас
Энэ долоо хоногт загасны ордныхонд адал явдал, сорилт, саад бэрхшээл дүүрэн байна. Мөн шинэ мэдээ сонсоно. Нөлөө бүхий хүмүүстэй танилцаж, бүтээлчээр хамтарч ажиллана. Хайртай хүнтэйгээ харилцахдаа тэвчээртэй байхыг зөвлөж байна. Бусдын оронд өөрийгөө тавьж үз. Танаас болж хайртай хүн чинь ядарч туйлдаад, арчаагүй нэгэн гэсэн мэдрэмж аваад байгаа юм биш биз. Хэрвээ хоёр биедээ хайртай хэвээрээ л бол хэн хэнийхээ сэтгэл санааг амгалан байлга. Үүний төлөө чадах бүхнээ хий. Энэ долоо хоногт таны анхаарал төвлөрөл сул байна. Гэхдээ ур чадвараа бэхжүүлэхийн тулд идэвхтэй суралцах шаардлага гарна. Бусдаас тусламж хүсэхээсээ өмнө дотоод нөөц бололцоогоо нэг шавхаад үз.
Холбоотой мэдээ