Мэргэжлийн сүмогийн Харү башёгийн түрүү бөх сэкивакэ Кирибаяама Б.Лхагвасүрэн ирэх башёд сайн барилдаж, озэки цол хүртэх хүсэлтэйгээ байгаагаа илэрхийлжээ. Өдгөө 26 настай тэрбээр өнгөрсөн башёгийн сүүлийн өдөр комүсүби Дайэйшотой нэмэлт барилдаан хийн ялснаар дээд зиндааны анхны түрүүгээ хүртсэн билээ.

Кирибаяама Б.Лхагвасүрэн өчигдөр/2023.03.28/ өгсөн ярилцлагадаа “Үнэхээр сайхан мэдрэмж байлаа. Гэхдээ өчигдөр өчигдөртөө дууссан. Өнөөдрөөс эхлэн дараагийн башёдоо анхаарлаа хандуулмаар байна. Зөвхөн гайхалтай бөхчүүд л озэки цолонд хүрдэг. Озэки болох талаар нэг их бодохгүйгээр бэлтгэлээ хийж, урьдынх шигээ амьдармаар байна” гэжээ.

Нацү башё ирэх тавдугаар сарын 14-ний өдөр Токио хотын Рёогокү Кокүгикан ордонд эхэлнэ. Кирибаяамагийн хувьд озэки болоход ердөө 10 даваа хэрэгтэй. Сүмогийн холбооны шаардлагад озэки цол хүртэх бөх нь гурван башё дараалан нийт 33 даваа авсан байх ёстой гэдэг. Харин Кирибаяама Б.Лхагвасүрэн Хацү башёд 11 даваа, Харү башёд 12 даваа тус тус аваад байна.

Гэхдээ ирэх Нацү башёгийн өрсөлдөөн амаргүй байх болно. Учир нь ёкозүна Тэрүнофүжи Г.Ган-Эрдэнэ болон озэки Такакэйшо нар бэртлээсээ эргэн ирж, барилдах төлөвтэй.

Өнгөрсөн Ням гаригт сүмогийн холбооны тэргүүн Хаккакү Кирибаяама Б.Лхагвасүрэнгийн озэки болох талаар “Энэ боломжийг ашиглах уу, алдах уу гэдэг нь түүний хэрэг. Тэр шаргуу хөдөлмөрлөх ёстой” гэжээ.