"Би үзэгчид рүү маш богинохон хугацаанд хардаг уран бүтээлч. Учир нь би удирдаач хүн. Уг нь миний мэргэжил морин хуурч. Гэтэл нэг л өдөр багш маань "Намайг удирдаач бол" гэсэн. Би "За" гэсэн. Энэ шагнал баг хамт олныг минь сайн ажилласан гэж урамшуулж буй шагнал гэж бодож байна. Би энэ тайзнаа ажлаа хийхээр гарна гэж бодсон ч шагнал авна гэж төсөөлсөнгүй" хэмээн талархал илэрхийлсэн энэ эрхэм бол Морин хуур чуулгын удирдаач Д.Түвшинсайхан. Тэрбээр "Мөнгөн мод-2022" наадмын "Шилдэг удирдаач" шагнал хүртсэн юм. Энэ жил анх удаа "Шилдэг удирдаач" номинацийг шинээр оруулж, шилдэг уран бүтээлчийг тодруулсан нь энэ.

"Мөнгөн мод" наадмын салхийг хагалж, Монгол Улсын Хөдөлмөрийн баатар, Ардын жүжигчин, Төрийн хошой шагналт хөгжмийн зохиолч Нацагийн Жанцанноров үг хэлж, эхний "Шилдэг судлаач" номинацийн эзнийг тодруулав.

Тэрбээр "Та бүхэндээ олон улсын театрын өдрийн мэндийг хүргэе. Өнгөрсөн 2022 онд соёл урлагийн салбар хөгжлийнхөө гол чигийг зөв барьж чадлаа. Ялангуяа тайз дэлгэцийн болон дүрслэх урлагийн бүтээлүүд олон улсад дээгүүр шан татсан нь үндэсний бахархал байлаа. Нөгөө талаар театр, кино урлаг шинэ дэвшилд хүрсэн гэж ойлгож болохоор байна. Уран бүтээлийн талаар олон нийтээрээ шүүн хэлэлцдэг болсон нь чухал ололт" хэмээн онцлон яриандаа дурдсан юм.

Соёл урлагийн шилдэг уран бүтээлч шалгаруулах "Мөнгөн мод" 14 дэх удаагийн наадам өчигдөр /202.03.27/ Дуурь, бүжгийн эрдмийн театрт болж, шилдгүүдээ тодрууллаа. Энэ наадмаар соёлын өв, ном хэвлэл, дуу хөгжим, тайзны урлаг, дүрслэх урлаг, кино урлаг, нийтлэл нэвтрүүлэг, цахим бүтээл, архитектур, хувцас загвар, зар сурталчилгаа, дизайн гэсэн 12 төрлөөр шилдэг бүтээл болон 12 төрлөөр шилдэг уран бүтээлчдийг шалгаруулав.

Өмнөх жил сайд дарга нар нь хүндэт зочдын суудалд тухалж, тайзнаа яам, Засгийн газрын бодлогоо танилцуулдаг байсан. Харин энэ жил албаны үгээс татгалзаж, нэг ч дарга тайзнаа гарч, үг хэлсэнгүй. Уран бүтээлчдийн сэтгэл догдолж, бие биедээ урам хайрласан үдэш болсноороо онцлог болов.

Ардын жүжигчин Г.Равдан “Б.Сэргэлэн дарга шиг албан ажлаа, Засгийн газрын “Шинэ эргэлтийн бодлого”-ын тухай ярих үнэхээр боломжгүй. Энэ бол театрын бурхад чуулсан газар болохоос биш албан контор биш ээ. Энэ сайхан гэгээн үдэш Засгийн газар, яамныхаа бодлого, энэ тэрийг ярьдаг цаг биш. Дарга нар “Хүрд эргүүлэх боломж олдлоо” гэсэн юм шиг тайзан дээр албан ажил, яамныхаа ажлыг сурталчлан таниулдгаа болимоор юм. Өнөөдөр энэ тайзны эзэд нь уран бүтээлчид байх ёстой" гэж хатуу шүүмж хэлж хэлж байсан удаатай. Тэр утгаараа сайд дарга нар ахмад уран бүтээлчийн үгийг зөв тусган авчээ.

Энэ жил 14 дэх жилдээ зохион байгуулж буй “Мөнгөн мод-2022” наадмын шилдэг уран бүтээлчийн төрөлд 82 уран бүтээлч, шилдэг уран бүтээлийн төрөлд 95 уран бүтээл, нийт 177 уран бүтээлч өнгөрсөн онд бүтээн туурвиж, олон нийтийн хүртээл болгосон бүтээлээрээ өрсөлджээ. Ингээд шилдэг уран бүтээлчдийг танилцуулъя.