Монгол цэргийн өдөр, орчин цагийн зэвсэгт хүчин үүсэн байгуулагдсаны 102 жилийн ойд зориулсан улс аймгийн алдар цолтой 256 бөхийн барилдаанд Ховд аймгийн Буянт сумын харьяат, улсын аварга О.Хангай түрүүлж, Ховд аймгийн Зэрэг сумын харьяат, улсын заан Б.Бат-Өлзий үзүүрлэв.

Их шөвөгт Сэлэнгэ аймгийн Цагааннуур сумын харьяат,  улсын арслан Б.Орхонбаяр, Хөвсгөл аймгийн Галт сумын харьяат, улсын өсөх идэр начин Ч.Батчулуун нар шалгарлаа. Харин дунд шөвгийн наймд улсын харцага Б.Цэдэнсодном, өсөх идэр начин Н.Мустафа, улсын начин Б.Батжаргал, Э.Даш  нар үлдэв.

Мөн сумын цолтон болон залуу бөхчүүдийн гуравдугаар сарын ээлжит барилдаанд 544 бөх уран мэх, авхаалж самбаа сорин барилдсанаас Архангай аймгийн Хотонт сумын харьяат, залуу бөх Б.Гончигсүрэн 10 даван хоёр дахь удаагаа түрүүллээ. Тэрээр 2022 оны 11-р сарын сумын цолтон залуу бөхчүүдийн барилдаанд мөн түрүүлсэн юм. Тэгвэл Говь-Алтай аймгийн Бугат сумын харьяат, сумын баяр наадмын хоёр түрүүтэй заан А.Хишигдорж үзүүрлэв.

Их шөвөгт Сэлэнгэ аймгийн Баруунбүрэн сумын харьяат, сумын заан А.Амархүү, дунд шөвгийн тавд Булган аймгийн Рашаант сумын заан А.Ширнэндагва, Завхан аймгийн Баянхайрхан сумын заан Б.Лхагварагчаа нар үлдэв.