Энэтхэгийн агаарын тээврийн "SpiceJet" компанийн хоёр нисгэгч бүхээгтээ кофе ууж, нарийн боов идсэн гэх шалтгаанаар ажлаасаа халагдаж магадгүй байна. "SpiceJet" нь харьцангуй хямд өртөгтэйдөө тооцогддог авиа компани юм. Нисгэгчид компанийн лого бүхий аягатай кофег онгоцны хяналтын хөшүүрэг дэргэд байрлуулсан нь Энэтхэгийн нисэхийн нийгэмлэг болон цахим ертөнцийн дургүйцлийг төрүүлэв. Мөн тэд Хинду шашинтнуудын баярын үеэр ихэвчлэн иддэг амтат шарсан боовыг барьсан байжээ.
"Манай компани бүхээг доторх хоол хүнсний хэрэглээний талаар хатуу бодлого баримталдаг. Үүнийг бүх нислэгийн баг дагаж мөрддөг. Мөрдөн байцаалтын ажиллагаа дууссаны дараа зохих арга хэмжээг авна" гэж компанийн хэвлэлийн төлөөлөгч мэдэгдлээ.
Нисэх онгоц ба зорчигчдын аюулгүй байдлыг бүрэн хариуцаж буй нисгэгч хүний хувьд энэ үйлдэл нь туйлын мэргэжлийн бус байсан гэдгийг тэтгэвэртээ гарсан нисгэгч Шакти Лумба мөн хэлжээ. "Энэ бол байж боломгүй зан үйл. Бүх нисгэгч бүхээгт шингэн зүйл асгарах ямар аюултайг мэдэж байгаа" гэж тэр хэлэв.
Тус хяналтын хөшүүрэг доор онгоцыг удирдахад чухал шаардлагатай цахилгааны утаснууд байдаг. Үүн дээр халуун зүйл асгасан тохиолдолд төхөөрөмж хэт халж, цаашлаад систем унтрах аюултай юм.
Эх сурвалж: CNN
