Монгол цэргийн өдөр, Монгол Улсад орчин цагийн Зэвсэгт хүчин үүсч, хөгжсөний 102 жилийн ойн баярын хурал, хүндэтгэлийн арга хэмжээ өчигдөр /2023.03.16/ боллоо. Цайвар цэнхэр өнгийн парад хувцасаар хослон, төрийн хүндэт медалаар энгэрээ гоёсон цэрэг эрс мөн баяр хүргэхээр ирсэн гэр бүлийн гишүүд Офицеруудын ордонг дүүргэжээ. Зөрөх зайгүй шахалдаж, шинэхэн цэцэгний нялуун үнэр хамар цоргиж, хацар шүргэн одно. Тусгайлан зассан тайзны урд сандал эгнүүлэн тавьж,  суудал бүрийг дугаарлан тэмдэглэжээ. Удалгүй заал дүүрч, ижил хувцасаар гоёсон цэрэг эрс сандал дээр цэмцийн сууцгаана. Чанга хөгжмийн ая явж, баярын хурал албан ёсоор эхэллээ. Хүндэт зочдоор Монгол Улсын Засгийн газрын гишүүн, Батлан хамгаалахын сайд дэслэгч генерал Г.Сайханбаяр, Ерөнхийлөгчийн Аюулгүй байдал, Батлан хамгаалах бодлогын зөвлөх дэслэгч генерал Ц.Тогоо, Батлан хамгаалахын дэд сайд Б.Баярмагнай, ЗХЖШ-ын дарга бригадын генерал С.Ганбямба, БХЯ-ны Төрийн нарийн бичгийн дарга бригадын генерал Д.Ганхуяг нар иржээ.

 Баярын хурлыг нээж ЗХЖШ-ын дарга бригадын генерал С.ГАНБЯМБА:

-Хүн төрөлхтний түүхэнд анх төрт улсыг үндэслэн байгуулж, Төв азийн цээжинд орших өргөн уудам тал нутагт нүүдэллэн аж төрж байсан монголчууд агуу эзэнт гүрнийг байгуулсан нь монгол цэргийн суу алдартай салшгүй холбоотой. Анхны төрт улс болох Хүннү гүрнээс эхтэй газар нутаг бол төр, улсын үндэс хэмээх бодлогоос улбаатай Их эзэн богд Чингис хааны төрийг төвшитгөх алсын хараатай, онч мэргэн төрийн бодлогоор залгамжилсан Монгол цэргийн баатарлаг, дайчин уламжлал нь монголчууд бидний уруудан доройтож, сэргэн мандсан буурал түүхийн хуудаснаа хадгалагдаж, зуун зуунаар өртөөлсөн хөгжил дэвшил, амжилт ололтоор баяжигдан эдүгээ бидэнд ирсэн.

1911 оны Үндэсний эрх чөлөөний хувьсгалаас хойш түүхэн цаг хугацаанд Монгол Улсын Зэвсэгт хүчин улс орныхоо эрх чөлөө, тусгаар тогтнол, үндэсний аюулгүй байдлын баталгаа төдийгүй төрийн бодлогын нэгэн чухал түшиг тулгуур, нийгмийн шинэчлэгч, манлайлагч, бүтээн байгуулагч гол хүчин байсаар ирсэн бахархам түүхтэй.

Өнгөрсөн зууны түүхэнд Монгол Улсын Зэвсэгт хүчин Монгол цэрэг “дэлхийн цэрэг” хэмээх хүндлэлийг хүртэж, НҮБ-д цэрэг хандивлагч орнуудаас 24 дүгээрт эрэмбэлэгдсэн нь чамлахааргүй амжилт юм.

Мөн Батлан хамгаалахын сайд Г.САЙХАНБАЯР:

-Хоёр зууны зааг дээр Монгол Улсын зэвсэгт хүчин хөгжлийхөө шинэ үе шат, бодлогын зорилтоо тодорхойлж хөгжлөө урагшлуулж байна. Өнгөрсөн зуунаас хойш Монгол Улсын тусгаар тогтнол, аюулгүй байдлын үнэ цэнийг хадгалж, үргэлжлүүлэн нэр төртэйгөөр төрийн даалгасан үүргийг биелүүлэх эрхэм үүрэг бидэнд оногдсон. Үүний дагуу бид өнгөрсөн зууны ажилд үнэлгээ дүгнэлт өгч, ирэх зууныхаа зорилтыг тодорхойлсон. Зууны зааг дээр зэвсэгт техникийн шинэчлэлийг Монголын зэвсэгт хүчин үндэсний зэвсэг техникээ бүтээж үйлдвэрлэдэг боллоо.

Сум, галт хэрэгсэлээ дотооддоо үйлдвэрлэх бэлтгэлийг бүрэн хангасан. Олон улсад болон энхийг сахиулхад үүрэг гүйцэтгэсэн цэргийн алба хаагчдын чадавхыг дээшлүүлж, шинэ төрлийн цэргийн гурван командлал шинээр байгуулж төлөвшүүлэх үйл ажиллагааг амжилттай хэрэгжүүлсэн. Олон улсын болон дэлхий дахины тэмцээнд энхийг сахиулах ажиллагаанд үүрэг гүйцэтгэж байгаа цэргийн албан хаагчдын тоо өсөж, чанарын өсөлт дэвшил гарлаа.

Энхийг сахиулах ажиллагаанд оролцох оролцоогоороо Монгол Улсын цэргийн албан хаагчид, баг бүрэлдэхүүн дэлхийд 25 дугаарт, Ази тивд нэгдүгээр байранд эрэмблэгдэж байна. Энэ бол өнгөрсөн зууны хугацаанд 102 жилийн түүхт Монгол Улсын Зэвсэгт хүчний томоохон амжилт юм. Зорилгоо хэрэгжүүлэхийн төлөө Батлан хамгаалах салбарын нийт бие бүрэлдэхүүн, офицер, ахлагч нар хичээнгүйлэн ажиллах ёстой. Гол нь бид тусгаар тогтнолоо өөрийн хүчээр, зэвсэг техникээрээ, өөрсдөө хамгаалах үндсэн хуулийнхаа суурь зарчмыг хэрэгжүүлэх гол бодлого, зорилгыг дэвшүүлсэн байгаа. Үүнд эргэлт гаргахаар чармайн ажиллаж байна.

ХИАГТ ХОТЫГ ЧӨЛӨӨЛЖ АНХНЫ ЯЛАЛТАА БАЙГУУЛСАН ГУРАВДУГААР САРЫН 18

Монгол цэргийн баярын өдөр нь БНМАУ-ын Бага хурлын тэргүүлэгчдийн 1946 оны тавдугаар сарын 28-ны өдөр хуралдсан 32 дугаар хурлаар Монгол Ардын хувьсгалт цэргийн баярын өдрийг тэмдэглэх тухай хэлэлцэж Монгол Ардын журамт цэрэг Хиагт хотыг чөлөөлж анхны ялалтаа байгуулсан гуравдугаар сарын 18-ны өдрийг “Хувьсгалт цэргийн баярын өдөр” болгон жил бүр улс нийтээр ёслон тэмдэглэх тогтоол гаргаж, энэ өдрийг цэргийн алба хаагчдын амралтын өдөр болгох болжээ. Үүнээс хойш 1939 оны Халх голын байлдаан, 1945 оны чөлөөлөх дайн гээд олон дайн байлдаанд Зэвсэгт хүчний бие бүрэлдэхүүн эх орныхоо тусгаар тогтнолыг батлан хамгаалж, халуун амь, бүлээн цусаараа тусгаар тогтнолоо хамгаалж ирсэн түүхэн үүргийг гүйцэтгэсэн армийн, зэвсэгт хүчнийхэний баярын өдөр гэдгээрээ онцлог юм.

Энэхүү Монгол цэргийн өдөр, орчин цагийн Зэвсэгт хүчин үүсэж хөгжсөний 102 жилийн ойг тохиолдуулан Батлан хамгаалах, Зэвсэгт хүчнийг хөгжүүлэн бэхжүүлэхэд үнэтэй хувь нэмэр оруулж, эрхэлсэн ажилдаа идэвх, зүтгэл гарган ажиллаж байгаа Батлан хамгаалах, Зэвсэгт хүчний нэгтгэл, анги, байгууллагын офицер, ахлагч, ажилтан албан хаагч болон ахмадуудыг салбарын шагналаар тус тус шагналаа.

Зэвсэгт хүчний 120 дугаар ангийн захирагч хурандаа Э.МӨНХ-ОРГИЛ:

-Батлан хамгаалахад алба хаасан дайчид, мөр зэрэгцэн алба хааж байгаа офицер, ахлагч, цэрэг, ажилчин албан хаагч, гадаад үүрэг гүйцэтгэж буй энхийг сахиулагч нартаа орчин үеийн зэвсэгт хүчин үүсэж хөгжсний 102 жилийн ойн мэнд хүргэе. Миний хөдөлмөрийг үнэлж төрийн дээд шагнал Хөдөлмөрийн улаан тугийн одонгоор шагнаж байгаад туйлын их баяртай байна. Би зэвсэгт хүчинд 27 дахь жилдээ алба хааж байна. Анх зэвсэгт хүчний эгнээнд орохдоо л “Монгол улсын төлөө зүтгэе” гэдэг үндсэн тангараг өргөж, алба үүргээ гүйцэтгэж байдаг. Тэр ч утгаараа Монгол улсынхаа төлөө, энэ тангаргатаа үнэнч байхын төлөө бүх ажил албаа гүйцэтгэдэг.

Батлан хамгаалах аж үйлдвэрийн нэгдлийн захиралын ажлын албаны дарга хурандаа Ө.БАТМӨНХ:

“Би зэвсэгт хүчинд 42 жил алба хааж байна. Сүүлийн 20 жилд Батлан хамгаалах салбарын хүний нөөцөд ажилсан. Батлан хамгаалах салбарын хүний нөөцийн чадавхыг дээшлүүлэх, хүний нөөцийн бодлого, хөгжил нийгмийн хамгааллийн асуудлуудыг түлхүү хөгжүүлэх тал дээр сүүлийн 20 жил ажиллаж байна. Энэ түүхт өдөр хөдөлмөрөө үнэлүүлж хөдөлмөрийн гавьяаны улаан тугийн одонгоор шагнуулж байгаадаа баяртай байна” гэлээ.

Түүнчлэн Монгол Улсын Зэвсэгт хүчин хоёр дахь зууныхаа түүхийг хэдийнээ эхлүүлж, бүтцэдээ тусгай хүчний, кибер аюулгүй байдал, барилга-инженерийн шинэ төрлийн цэргийг бий болгон хөгжүүлж, түүхт 102 жилийн ойгоо өмнөө дэвшүүлсэн зорилго зорилтоо биелүүлэхийн зэрэгцээ улс орныхоо хөгжлийг урагшлуулсан ололт, амжилт дүүрэн угтаж байгааг онцолсон юм.

Э.Хулан, Д.Нямхүү