Австрали улсаас англи хэлний сайн дурын багш нарыг ажиллуулна

Боловсрол, шинжлэх ухааны сайд Л.Энх-Амгалан тэргүүтэй төлөөлөгчид энэ өдрүүдэд Австралийн Холбооны улсад айлчилж байна. Айлчлалын хүрээнд өнөөдөр /2023.03.07/ Австралийн Холбооны улсын Боловсролын сайд Жейсон Клэйртэй албан ёсны уулзалт хийсэн байна.

Уулзалтын үеэр Монгол, Австралийн боловсролын салбарын хамтын ажиллагааны өнөөгийн байдал, цаашид хэрэгжүүлэх арга хэмжээний талаар санал солилцжээ.

Энэ үеэр Монголын оюутан залуусын боловсролын түвшинг дээшлүүлэхэд Австралийн тэтгэлэгт хөтөлбөр чухал хувь нэмэр оруулж буйд талархлаа илэрхийлээд цаашид хоёр улсын боловсролын салбарын хамтын ажиллагааг өргөжүүлэх чиглэлд онцгой анхаарч ажиллахыг хүссэн байна. Ялангуяа Австралийн тэтгэлэгт хөтөлбөрөөс Монголын оюутнуудад жил бүр олгодог одоогийн 10 квотыг хамтарсан санхүүжилтээр 50 болгож нэмэгдүүлэх, Монгол Улсын боловсролын тогтолцоо, үнэлгээний системийг боловсронгуй болгох чиглэлээр хамтран ажиллах талаар талууд санал солилцжээ. Мөн багш нарын мэргэжлийг дээшлүүлэх, тэр дундаа англи хэлний сайн дурын багш нарыг ажиллуулах чиглэлд идэвхтэй хамтран ажиллах сонирхолтой байгаагаа илэрхийлэв.

Австралийн Боловсролын сайд Жэйсон Клэйр Австрали, Монголын боловсролын салбарын хамтын ажиллагааг өргөжүүлэн хөгжүүлэхэд санал нэг байгаагаа илэрхийлж, ялангуяа монголын залуу боловсон хүчнийг Австрали улсад бэлтгэх, англи хэлний багш нарын ур чадварыг дээшлүүлэх, их, дээд сургуулиудын хамтын ажиллагааг өргөжүүлэхэд анхаарал хандуулж ажиллахаа илэрхийлжээ.

Австрали улсын Мэргэжлийн сургалт үйлдвэрлэлийн төвүүдтэй хамтарч ажиллана

Австралийн Холбооны улсад хийж байгаа ажлын айлчлалын эхний өдөр буюу өчигдөр (2023.03.06) Боловсрол, шинжлэх ухааны сайд Л.Энх-Амгалан тус улсын Парламентын гишүүн, Мэргэжлийн ур чадвар, сургалт хариуцсан сайд Брэндан Оконнортой уулзсан байна.

VET буюу мэргэжлийн ур чадварын сургалт нь практик ур чадвар олгоход голчлон анхаардаг. Шууд ажиллах сонирхолтой ахлах ангийн сурагчдад болон мэргэжлээ өөрчлөх, ур чадвараа ахиулах хүсэлтэй насанд хүрэгчдэд зориулсан байдаг аж. Харин техник мэргэжлийн боловсролын сургуульд улирлаар богино хугацааны сургалт хэлбэрээр эсвэл багц хөтөлбөрөөр суралцаж болдог юм байна.

TAFE сургалт нь илүү уян хатан байдаг учраас ажиллангаа суралцах, эсвэл коллеж, их сургуульд биечлэн суралцах боломжгүй хүмүүст тохиромжтой. 2022 оны байдлаар мэргэжлийн боловсрол сургалтын байгууллагад гадаадын 273 мянган оюутныг сургаж байна. Гадаад оюутнуудын сургалтын төлбөр 6000-66000 Австрали доллар.

Уулзалтын үеэр өөрийн орны мэргэжлийн боловсролын салбарт баримталж байгаа бодлого, цаашдын зорилгоо танилцуулсан. Улмаар хоёр улсын мэргэжлийн сургалтын үйлдвэрлэлийн төвүүд туршлага харилцан солилцох, хамтран ажиллахад дэмжлэг үзүүлж ажиллахаар боллоо. Мөн онцгой байдлын аврагчдыг мэргэшүүлэх, дахин сургах чиглэлээр хамтран ажиллах хүсэлтийг манай талаас илэрхийллээ.