Нүүрсний хэргээр шалгагдаж буй “Тавантолгой транс” ХХК-ийн гүйцэтгэх захирал Д.Дагвадорж нарт хязгаарлалт тогтоох, таслан сэргийлэх арга хэмжээ авах тухай саналыг Нийслэлийн прокурорын газраас гаргасныг Хан-Уул дүүргийн Эрүүгийн хэргийн анхан шатны шүүх гуравдугаар сарын 1-нд хэлэлцэн, гаргасан саналыг үндэслэлтэй гэж үзэн, дараах яллагдагч нартай уулзахыг хориглож шийдвэрлэжээ.

Тодруулбал, Д.Дагвадоржийг 2013-2017 оны хооронд 4.1 сая тонн нүүрс худалдаж, худалдан авах 4 удаагийн гэрээг “Тавантолгой” ХК-тай байгуулж үүнээс 1,823,965,62. тонн нүүрсийг худалдан авч Монгол Улсын хилээр 2,185,795,47 тонн нүүрсийг экспортолж, зөрүү 361,498,33 тонн нүүрсийг хууль бусаар хяналтгүй 373 тээврийн хэрэгслээр 1,264 удаагийн давтамжтайгаар экспортод гаргаж нууцаар хууль бусаар нүүрс хулгайлж улсад их хэмжээний хохирол учруулсан хэрэгт нь Эрүүгийн хуулийн тусгай ангийн 17.1 дүгээр зүйлийн 2 дахь хэсгийн 2.3 дахь заалтад зааснаар эрүүгийн хэрэг үүсгэн яллагдагчаар татан мөрдөн шалгах ажиллагаа явуулж байна.

Мөн Нийслэлийн прокурорын газраас ирүүлсэн “Тавантолгой транс” ХХК-ны санхүү эрхэлсэн дэд захирал байсан Д.Эрдэнэбаяр, хангамжийн менежерээр ажиллаж байсан П.Мөнхчулуун, ерөнхий ня-бо-гоор ажиллаж байсан Ө.Мөнхтайван, ашиглалтын инженерээр ажиллаж байсан З.Эрдэнэбаяр нарт хэрэг хянан шийдвэрлэхэд саад учруулахгүй байх зорилгоор хэргийн бусад яллагдагч нар болон бусад оролцогч нартай уулзахыг хориглох, мөн Монгол Улсын хилээр гарахыг хязгаарлах” таслан сэргийлэх арга хэмжээ авахуулах саналыг хянан хэлэлцээд:

Яллагдагч Д.Эрдэнэбаярыг Монгол Улсын хилээр гарахыг хязгаарлах, мөн тодорхой хүмүүстэй уулзахыг хориглох,

Яллагдагч Ө.Мөнхтайваныг Монгол Улсын хилээр гарахыг хязгаарлах, мөн тодорхой хүмүүстэй уулзахыг хориглох,

Яллагдагч П.Мөнхчулууныг Монгол Улсын хилээр гарахыг хязгаарлах, мөн тодорхой хүмүүстэй уулзахыг хориглох,

Яллагдагч З.Эрдэнэбаярыг Монгол Улсын хилээр гарахыг хязгаарлах, мөн тодорхой хүмүүстэй уулзахыг хориглох таслан сэргийлэх арга хэмжээг авч шийдвэрлэв.

Харин яллагдагч Б.Түвшинбаярт “Тавантолгой” ХК-ны ТУЗ-ийн даргаар ажиллахыг түдгэлзүүлэх таслан сэргийлэх арга хэмжээг авлаа.

Яллагдагч Д.Эрдэнэбаяр, Ө.Мөнхтайван, П.Мөнхчулуун, З.Эрдэнэбаяр нарыг хуулийн этгээдийн гүйцэтгэх албан тушаалтан болон удирдлагаас өгсөн шийдвэрийг хууль бус болохыг мэдсээр байж итгэмжлэн хариуцуулсан эд хөрөнгийг завшиж улсад 11,405,595,413 төгрөгийн хохирол учруулсан хэрэгт нь Эрүүгийн хуулийн тусгай ангийн 17.4 дүгээр зүйлийн 2 дахь хэсгийн 2.1, 2.2-т заасан /Хөрөнгө завших/ гэмт хэрэгт холбогдуулан яллагдагчаар татаж, мөрдөн байцаалтын ажиллагаа үргэлжлэн явагдаж байна гэж Нийслэлийн Баянгол, Хан-Уул, Сонгинохайрхан дүүргийн Эрүүгийн хэргийн анхан шатны шүүхийн Тамгын газраас мэдээллээ.

Г.ХОРОЛ