Сагсан бөмбөгийн 2025 оны Азийн аваргын урьдчилсан шатанд өрсөлдөх эрхийн төлөөх тэмцээний F хэсгийн тоглолтууд Улаанбаатар хотноо гурван өдрийн турш болж өндөрлөлөө. Гуам, Монгол, Тайланд, Хонг Конг гэсэн дөрвөн баг дараагийн шатны эрхээ авч, Малайз, Сингапур хоёр ганзага хоосон буцав.

Монголын шигшээ баг Сингапур, Хонг Конгийг хожсоноор дараагийн шатны эрхээ авсан бөгөөд хэсгийн сүүлийн тоглолтоо Гуамын эсрэг хийсэн. Ерөнхийдөө даалгавраа аль хэдийнэ биелүүлсэн бөгөөд дэлхийн чансааны оноогоо ахиулахын төлөө хүчирхэг Гуамтай хүч үзсэн. Нэгдүгээр үед Монголын шигшээ хүссэн эхлэлээ тавьж, 26-15 гэсэн харьцаатай илт давуу тэргүүлсэн. Ялангуяа М.Өлзий-Орших, Т.Санчир нарын алсын зайн шидэлтүүд байндаа тусч байлаа. Харин хоёрдугаар үеэс Гуам сэргэж, онооны зөрүүг бага багаар ойртуулсаар гуравдугаар үед хоёр багийн тоо тэнцэж ирсэн. Энэ үед “Хөх чононууд”-аас О.Энхбаатар, А.Ананд нар санаачлагатай байж, багийнхаа оноог ахиулахад чухал үүрэг гүйцэтгэв.

Тоглолтын эцсийн мөчид онооны харьцаа 81-79 байхад Гуамын Росс гурван онооны шидэлтийг амжилттай болгосноор 81-82 болж, Гуам илүү гарсан. Тоглолт дуусахад ердөө 3.4 секунд үлдсэн байхад Т.Санчир шидэлт гүйцэтгэсэн ч дутаж, Гуам ялалт байгуулсан. Тэднээс Жонатан Галловэй, Тай Уэсли гэх самбарын тамирчид нь нийлээд 44 оноо, 16 самбараас бөмбөг авалт толилуулсан нь ялалт байгуулах гол шалтгаан нь байлаа. Эсрэгээрээ Монголын шигшээн алсын зайн шидэлтүүд гайхалтай байсныг нь дурдах нь зүйтэй.

Азийн шилдэг 24 баг урьдчилсан шатанд өрсөлдөж, 16 нь 2025 оны Азийн аваргад оролцоно. Эдгээр тоглолтууд 2023 оны арваннэг, 2024 оны хоёр, арваннэг, 2025 оны хоёрдугаар саруудад болох хуваарьтай. Харин шигшээ багийг үүнэс өмнө есдүгээр сарын 23-нд эхлэх Ханчжоугийн Азийн наадам хүлээж байна.