Монголын сагсан бөмбөгийн тамирчид, зүтгэлтнүүд, хөгжөөн дэмжигчдийн баярын өдөр өнөөдөр/2023.02.12/ тохиож байна. Тодруулбал, дээд лигийн 2023 оны бүх оддын тоглолт 14.00 цагаас “UG” аренад эхэлнэ. Энэ жилийн бүх оддын тоглолт урьд жилүүдийнхээс илүү өргөн цар хүрээтэй, шинэлэг болж буй.

Хөтөлбөрийн эхэнд 14.00 цагаас тамирчдын гарын үсэг зурах ажиллагаа байгаа бөгөөд үүний хажуугаар тамирчид болон олны танил эрхмүүдийн хооронд “NBA 2k23” тэмцээн болно.

Үүний дараа 14.50 цагаас бүх оддын нээлт болж, эмэгтэй бүх оддын тоглолт эхэлнэ. Тоглолтын завсарлагаанаар эмэгтэй оддын дундах холын зайн шидэлтийн тэмцээн болох аж.

Харин эмэгтэй оддын тоглолтын дараа ур чадварын тэмцээн болно. Энэ жил ах, эгч дүүс нэг легионер тамирчны хамтаар нэг баг болж өрсөлдөнө.

18.00 цагаас холимог оддын тоглолт эхлэх хуваарьтай. Улсын арслан Б.Орхонбаяр, Ангууч буюу Б.Баттөр тэргүүтэй олны танил эрхмүүд сагсан бөмбөгийн талбайд хүчийг үзнэ.

Ингээд бидний хүсэн хүлээсэн тохолтын тэмцээн эхэлнэ. Өнгөрсөн жилийн аварга Б.Бишрэлт гурван легионер тамирчны эсрэг цомоо хамгаалахаар дүүлэн ниснэ.

Эцэст нь эрэгтэй бүх оддын тоглолт болж, Монголын багийн эсрэг легионерууд тоглоно. Мэдээж завсарлагаанаар нь лигийн шилдэг шидэгчийн тулаан та биднийг хүлээж байна.

Дашрамд дуулгахад, бүх оддын тоглолтын тасалбар сарын өмнө дууссан билээ.