"18 настай хүүхэд дүүгийнхээ ээж нь болж хүүхдийн мөнгөө авсан"

Хүүхдийн мөнгөө авч чадаагүй ээжүүдийн төлөөлөл өнөөдөр /2023.02.09/ мэдээлэл хийлээ.

"Ээжүүдийн төлөөлөл" фэйсбүүк группийг админ А.Дөлгөөн:

-Би ээж, хоёр настай охинтойгоо амьдардаг. Хүүхдийн мөнгөн тэтгэмжээс хасагдсан есөн хувьд багтсан ээж байна. Энэ шударга бус асуудалтай санал нийлэхгүй байсан учраас өөртэйгөө ижил асуудал үүссэн ээжүүдтэй нэгдэж, мянгуулаа болсон. "Бид ориловч, төр дүлий" гэдэг үгийг онцолж байна. Монгол Улсын нийт хүн амын 30 гаруй хувийг нь хүүхдүүд эзэлдэг. Эдгээр хүүхдүүдийн асран хамгаалагч, эцэг эхчүүдийн тоог нэмэхээр энэ тоо 50-иас дээш хувийг хол давна. Энэ олон хүнийг төлөөлж, үгээ хэлэхийг хичээж байна. Бид олон нийтийн сүлжээ, хэвлэлээр дамжуулан байр сууриа илэрхийлсэн боловч төрөөс ямар ч арга хэмжээ авахгүй байна.

Бид 5000 төгрөг цуглуулж, өнөөдрийн хэвлэлийн бага хурлыг зохион байгуулж байна.

Миний ард байгаа 4000 гаруй ээжийн төлөөлөл анхан шатны нэгжээс нь эхлэн бүх байгууллагад өргөдөл, гомдол хүргэсэн. Ямар нэгэн хариу ирүүлээгүй учраас Төрийн гурван өндөрлөгт захидал хүргүүлж байна. Бид хоёрдугаар сарын 8-наас өмнө бүртгэлтэй байр, машинаа хамаатан садныхаа нэр дээр шилжүүлж байж хүүхдийн мөнгөө авах юм шиг мэдээллийг албаныхан өгч байна. Шинэчлэгдсэн мэдээллийн дагуу 90.8 хувьд иргэдийн дансанд хүүхдийн мөнгийг олгосон байна. Өмнө нь мэдээлэл хийхдээ "18 нас хүрээгүй хүүхэд тусдаа өрх тусгаарлаж, бүртгүүлээд дүүгийнхээ ээж нь болж хүүхдийн мөнгөө авсан байна. Энэ тооцооллын алдаа юу. Хүүхдийн мөнгө хүрэх ёстой хүндээ хүрээгүй байгаагийн нэг жишээ. Энэ бол алдаа. Ийм алдаа гарсаар байхад хүүхдийн мөнгөө олгосоор л байна гэв.