Газар хөдлөлтийн гамшигт өртсөн Сирийн баруун хойд хэсэгт хүмүүнлэгийн анхны цуваа хүрчээ. Сүүлийн 11 гаран жилийн хугацаанд иргэний дайны хөлд Сирид эрүүл мэнд, онцгой байдал, дэд бүтэц маш ихээр хоцрогдож, муудсан. 

Аврах ажиллагаа үргэлжилсээр байгаа тул нас барагсдын тоо өссөөр байна. Одоогийн байдлаар амь үрэгдсэн хүний тоо 16 мянга дөхсөн бөгөөд Туркэд 12873 хүний цогцсыг нурангиас татаж гаргасан бол Сирид хохирогчдын тоо 3000 дөхжээ.

Эх сурвалж: Reuters

Турк болон Сирийн газар хөдлөлтөд өртсөн бүс нутгаас олдсон хараа хяналтгүй нярай хүүхдүүдийг аюулгүй тээвэрлэн Анкара хотын эмнэлэгт авчирчээ. Туркийн ерөнхийлөгчийн онгоцоор 16 нярайг Кахраманмарас хотоос Анкара руу тээвэрлэсэн байна. Эдгээрээс хоёр нярайг нурангин дороос аварсан бол үлдсэн нь харах хүнгүй ганцаараа олдсон аж.

Газар хөдлөлтийн дараах аврах ажиллагаанд ашиглахаар Туркийн ерөнхийлөгчийн онгоцыг бэлэн байдалд оруулсан.

Мөн ерөнхийлөгч Режеп Тайип Эрдоган амь үрэгдсэн хүмүүсийн дурсгалыг хүндэтгэхээр долоо хоногийн хугацаатай улс даяар гашуудал зарлалаа.

Турк, Сирийн ард иргэдэд гашуудал илэрхийлэх үүднээс Израиль, Босни улсуудад барилгуудыг гэрэлтүүлж байна. 

Эх сурвалж: Dailymail.co.uk

Турк, Сири улсад болсон газар хөдлөлтөд амь үрэгдсэн хүний тоо одоогоор 15 мянгыг даваад байна. Тодруулбал, Турк услад 12391 хүн нас барсныг олж гаргасан бол Сирид амь үрэгдэгсдийн тоо 2992-д хүрчээ. 

Турк, Сирийн нутагт газар хөдлөлтөд олон мянган барилга нурсан бөгөөд аврах, эрэн хайх ажиллагаа гурав дахь өдрөө үргэлжилж байна. Дэлхийн 50 шахам улсаас аврах багаа үнэрч нохдын хамт Турк улс руу илгээсэн боловч туркчууд аврах, эрэн хайх ажиллагааг удаашралтай байгааг шүүмжилж, бухимдаж байна. Турк улс нь газар хөдлөлтийн идэвхтэй бүсэд оршдог учраас урьдчилан сэргийлэх, гамшгийн үед ашиглахаар иргэдээс хураасан "газар хөдлөлтийн татвар"-тай. Тиймээс Туркийн ерөнхийлөгч байгалийн гамшигт урьдчилан бэлдэх боломжгүй гэж мэдэгдсэн нь туркчуудын бухимдлыг төрүүлжээ. Өмнө нь Истанбул хотын ойролцоо 7.4 магнитуд газар хөдөлснөөс 18 мянга орчим хүн амь үрэгдэж байв. Харин НҮБ-аас тооцоолсноор энэ удаагийн газар хөдлөлтөд амь үрэгдсэн хүний тоо 20 мянгад хүрнэ гэж тооцоолжээ. 

Хоёр орны газар нутагт 7.8 магнитудын хоёр газар хөдлөлт болсноос амь үрэгдэгсдийн тоо өнөөдрийн байдлаар 12 мянгад хүрээд байгаа юм. Энэ нь 2011 оны гуравдугаар сард Японд 9.0 магнитуд газар хөдөлж, цунамийн гамшиг болсноос 20 мянган хүн амь үрэгдсэнээс хойших хамгийн олон хүний амийг авсан гамшигт тооцогдож байна.

Барилгын нурангид дарагдсан хүмүүс нөхцөл байдлаасаа шалтгаалан аврагдах хүртлээ хэдэн өдрөөс хэдэн долоо хоногоор амьд тэсэх боломжтой гэдгийг мэргэжилтнүүд хэлж буй. Аврагчид нурсан барилгуудыг ухахдаа хүний ​​гинж үүсгэж, тусламж гуйхыг сонсох найдлагатайгаар чимээгүй байхыг уриалж байгаа аж. Олон барилга нурсны дээр үлдсэн барилгууд нь нурах эрсдэлтэй тул иргэдийн нэлээд хэсэг нь хоргодох газруудад төвхөнөсөн ч автомашиндаа тэр ч бүү хэл гадаа хасах хэмийн хүйтэнд хөнжлөөр ороогоод хоног төөрүүлэхэд хүрч байгаа аж. “Манайд майхан, халаалтын зуух, юу ч байхгүй. Манай хүүхдүүдийн биеийн байдал тааруу байна. Бид бүгд бороонд норж, хүүхдүүд маань хүйтэнд гадаа байна. Бид өлсгөлөн, газар хөдлөлтөөс болж үхэхгүй. Харин хүйтэнд хөлдөж үхэх болно. Ийм байж болохгүй. Хэн ч тусламж явуулахгүй байна" гэж 27 настай Айсан Курт ярьжээ.

Нөгөө талд Туркийн ерөнхийлөгч газар хөдлөлтөд хамгийн их сүйдсэн Хатай мужид очиж, нөхцөл байдалтай танилцсан байна. Тус мужид 3300 гаруй хүн нас барсныг тогтоогоод байгаа бөгөөд орон сууцны хорооллууд бүхлээрээ нуржээ. 

Тус мужийн оршин суугчид засгийн газраас тусламж үзүүлэхдээ удаан байгааг шүүмжилжээ. Харин Эрдоган аврах ажиллагаанд алдаа доголдол гарч байгааг хүлээн зөвшөөрөөд Хатай нисах буудлын онгоцны замууд газар хөдлөлтөд сүйдсэн учраас тусламж хүргэхэд хүндрэл учирч байгааг тайлбарлажээ. 

ЭХ СУРВАЛЖ: ASSOCIATED PRESS