“Монголын төмөр зам” ТӨХК-ийн захирал П.Ганхүү өнөөдөр /2023.02.02/ сэтгүүлчдэд мэдээлэл хийлээ.

Тэрбээр “Монголын төмөр зам” компани гарааны шатандаа ирсэн, 669 хүнтэйгээр үйл ажиллагаа явуулж байна. Энэ онд Тавантолгой-Зүүнбаян чиглэлийн төмөр замаар 5 сая тонн ачаа тээвэрлэх тооцоолол гаргасан. Цаашид Монголын төмөр зам компанийн тээвэрлэх ачаа тээврийг нэмэгдүүлнэ. Ингэхийн тулд зүтгүүр, вагоныг нэмэгдүүлэх шаардлага байгаа, энэ чиглэлээр эрчимтэй ажиллаж байна.

Хоёр дахь том ажил нь Засгийн газар, Ерөнхий сайдын зүгээс боомтын сэргэлтийг чухалчилж байгаа. Ялангуяа урд хөрш рүү чиглэсэн боомтууд дээр гарцаа нэмэгдүүлэхгүй бол эдийн засгийн 90 орчим хувь уул уурхайн экспортоос хамаардаг болсон. Монгол Улсын Засгийн газар Монголын төмөр зам компанид баруун босоо, зүүн босоо тэнхлэгийн төмөр замын концесс хэрэгжүүлэх эрхийг олгосон. Одоогоор хамтрагчаа сонгох ажил эцэслээд явж байна.

Баруун босоо төмөр зам гэдэг нь Арц сууриас яваад Шивээхүрэнгээр гарах зам, энэ бол үндсэн зам. Дээр нь Шивээ хүрэн, Сэхээгийн боомтын төмөр зам гэдэг хоёр тусдаа зүйл яригдаж байгаа. Зүүн босоо төмөр зам гэдэг нь Чойбалсангаас- Хөөт-Бичигт явж байгаа.

БНХАУ-ын талтай холболтын төмөр замын хэлэлцээ хийхэд Монголын төмөр зам ТӨХК ажиллана. Бид эхлээд боомтынхоо төмөр замыг барина. Бичигт-Зүүнхатавч дээр 7 км төмөр зам барина. Дотроо өргөн, нарийн царигтай аль аль нь баригдана. Шивээхүрэн-Сэхээ дээр 13 км төмөр зам барина. Хэлэлцээ үргэлжилж байна.

Боомтуудын төмөр замын ТЭЗҮ-ийг Монголын төмөр зам ТӨХК-ийн баг боловсруулна. Бид өөрсдөө ТЭЗҮ-ээ гаргана гэсэн үг. Хоёр боомтын төмөр замыг БНХАУ-ын талтай тохирч холбоод ирэх долдугаар сард тээврээ эхлүүлэх зорилт тавьсан. Энэ ажил зөвхөн биднээс шалтгаалахгүй. Тээвэр хийхдээ хил дээр автомашинаар аваачаад, цааш нь төмөр замаар гаргана. Ингээд 2023 он дуустал 250-300 мянган тонн ачаа тээвэрлэнэ.

Боомтын төмөр замууд баригдахтай зэрэгцэн дотоодын төмөр зам барих ажлаа эхлүүлнэ. Зүүн босоо төмөр замын тухайд, Бичигтээс Хөөт чиглэлд 100 км төмөр замыг энэ ондоо барина. Баруун босоо төмөр замын тухайд, Шивээхүрэнгээс Шинэжинст рүү 300 км-ийг барих төлөвлөгөөтэй байна. Боомтын төмөр замд хөрөнгө оруулах, хамтрах компани сонгогдсон. Зүүн босоо төмөр замын холболтын төмөр замыг “East Railroad Consortium” гэх компани барина. Баруун босоо төмөр замын холболтын төмөр замыг Өсөх зоос ХХК, Эс Жи Эс ХХК, МАК ХХК тэргүүтэй таван компани нэгдэж байгуулсан Нарийнсухайтын төмөр зам ХХК барина. Тэд өөрсдөө хөрөнгөө оруулна, манайх хяналт болон тээврийн үйл ажиллагааг хариуцна” гэлээ.

Г.ХОРОЛ