Барилга хот байгуулалтын сайд Ц.Даваасүрэнгээс цаг үеийн асуудлаар тодруулаа.

-Олон нийтийн сүлжээнд хүний эрхийг хамгаалах тухай хуульд Ерөнхийлөгч хориг тавьсан. Одоо УИХ-ын гишүүд хүлээж авах эсэхээс бүх зүйл шалтгаална. Та хоригийг хүлээж авах уу?

-Засгийн газрын гишүүн учраас Засгийн газрынхаа эсрэг ярьж болохгүй. Гэхдээ Засгийн газар ямар байр суурьтай байсныг хэлье. Би Засгийн газарт эргэлзсэн байр суурьтай байсан. Олонхийн шийдвэр гарсан учраас дагахаас өөр аргагүй. Хууль нь тийм байна лээ. Яагаад эргэлзсэн гэхээр цаг үе нь болоогүй юм биш үү гэдэг асуудлыг тавьсан. Кибер халдлагын асуудал байгаа. Янз бүрийн өнгөт хувьсгалуудыг ашиглаж хийдэг юм байгаа шүү дээ. Энэ чиглэлээр бодитой ажлууд байгаа. Гэхдээ иргэдийн зарим нэг шүүмжлэлтэй хандсан хуудсыг хаах зүйл байж болохгүй гэдэг хатуу байр суурьтай байна. Хэрвээ Ерөнхийлөгчийн хориг орж ирвэл хүлээж авна.

-Ипотекийн найман хувийн хүүтэй зээл авсан иргэдийн зээлийг зургаан хувь болгохоор судалж байгаа юм байна. Эдийн засгийн даац боломж нь ямар байна вэ?

-68 мянган найман хувийн зээлтэй иргэн бий. Хэрвээ найман хувийн зээлийг зургаан хувь руу шилжүүлнэ гэвэл 500 гаруй тэрбум төгрөг шаардлагатай. Энэ зээлийг өгсөн байгууллагуудтай бид ярих ёстой юм. Тэд ийм хэмжээний төлөвлөж байсан орлогоо алдах, үүрэх боломж байгааг ярилцах ёстой. Дараа нь энэ асуудлыг Засгийн газраар оруулаад, энд яаж оролцох уу ямар хөнгөлөлт үзүүлж болох уу гэдгийг ярилцаж байгаад шийдье гэсэн итгэл үнэмшлээр ажиллаж байна. Ерөнхий сайд ч мөн тийм чиглэл өгсөн.

-Сангийн сайдыг огцруулах ёстой гэсэн байр суурийг илэрхийлж байсан. Энэ байр суурь чинь одоо хэвээрээ байгаа юу?

-Хэвээрээ л байгаа шүү дээ. Тухайн үед нь би тодорхой баримтуудыг хэлсэн. Ерөнхий сайд тодорхой асуудлыг тавьсан. Дараа нь түр хороо байгуулагдсан. Би түр хорооны даргад хэлсэн.

-Дарханы арьс ширний үйлдвэр юу болж байгаа вэ. Тэнд таны ямар эрх ашиг байгаа болоод Сангийн сайдыг дуэльд дуудах болов?

-Тэнд төвөгтэй юм байгаа. Хувийн хэвшил, төрийн төсөл хэрэгжсэн. Хөгжлийн банкнаас 18 тэрбум төгрөг авсан. Бас хувийн хэвшлүүдийг оролцуулсан. Нийтдээ тэнд ашиглахад хүндрэлтэй дэд бүтэц хийгээд орхичихсон. Тэрийгээ 44 тэрбум гээд үнэлсэн. Энэ хувийн хэвшлийн түншлэлийг хариуцаж байсан захирлыг одоо АТГ-аас мөнгө угаасан гээд хорьчихсон гэж сонссон. Энэ асуудлыг цааш нь үргэлжүүлнэ гэвэл хүндрэлтэй. Цаг алдахын оронд төрийн өмчийн арьс ширний үйлдвэр байгуулъя гэж ажилласан. Энэ ажил эрчимтэй явж байсан ч Эмээлтэд барина гээд ороод ирсэн. Арьс ширний үйлдвэр барина гэхээр гадна, дотны зохион байгуулалттай зогсоох юм. Дотоод гэвэл манай арьс ширний компаниуд. Шууд л хэлье. Тэд нар хямдхан арьс авахыг бодож байна. Арьсны үнэ унаад хог болоод хэвтэж байгаа. Тэд нар үнэгүй арьс авахыг бодож байна. Хэрэв Дарханы арьс ширний цогцолбор ашиглалтад орвол арьс шир үнэд орно. Хүйтэн нөхцлийн арьс ширээр хамгийн үнэтэй, хамгийн удаан эдэлгээтэй хувцас, эдлэлийг хийнэ. Халуун орны арьс ширээр тийм зүйл хийж болохгүй. 1990-ээд оноос хойш үүнийг бодлоготой унагаасан. Яг нөлөөлж байгаа. Хэвлэл мэдээлэл, сошиалаар янз бүрийн юм цацдаг.

-Хувийн хэвшилтэйгээ хамтдаа ярилцаад хийх гарц, гаргалгаа байхгүй юм уу?

-Тэд нар хийж чадахгүй юм байна лээ. Мөнгө угаачихсан нөхдүүд таньдаг хүнтэйгээ уулзаад зөвтгөх гээд байна. 30 жилийн хугацаанд ийм ашигтай бизнесийг хийх нь яасан юм бэ? Энэ үйлдвэр баригдвал гадны томоохон компаниуд манай арьс ширийг булаацалдаад л авна. Тийм орлоготой болохоос нэг хэсэг нь айгаад нөгөө хэсэг нь хямд арьс шир авахыг бодоод байна.