Цахим хуудаст эерэг давлагаа үүсгэж, анги, танхимаа монгол ёс уламжлалыг таниулах хүрээнд тохижуулсан сургуулийн мэдээлэл гарсан. Тодруулбал, нийслэлийн ерөнхий боловсролын 67 дугаар сургуулийн “Бага сургууль”-ийн багш ажилчид санаачлан хүүхдийн сурах орчинг сайжруулах зорилгын хүрээнд анги танхимаа тохижуулсан байна. Мөн давхар бүрийн коридор хэсгийг уламжлалт ёс заншил, монгол ахуйгаар сэдэвжүүлэн тохижилт хийжээ. Тодруулбал, сургуулиа таван хошуу малын арьс, шир, эдэлгээнд ашиглагддаг эмээл, хазаар, ногт гээд уламжлалт аж ахуйн бүхий л эдлэл хэрэглэлийг хүүхэд бүр бодитоор үзэж, харж болохоор бүтээж, тохижуулсан байна.

Хүүхдийн танин мэдэхүйд нөлөөлөхүйц гарт баригдаж нүдэнд харагдах олон талын ач холбогдолтой үзүүлэн ашиглах нь уламжлалт ёс заншлыг таниулах давуу талтай.

Түүгээр ч зогсохгүй цаашлаад хүрээлэн буй орчин, замын хөдөлгөөний аюулгүй байдлын талаар гэх мэт хүүхдийн сурах, хөгжих чадварыг дэмжих, мэдвэл зохих мэдлэг мэдээллүүдийг сонирхолтой байдлаар өгөх боломжтой аж.

Ийнхүү орчин үеийн хэв шинжийг агуулж, уламжлалт ёс заншлаа сурагчдад таниулах зорилготой анги танхимууд нь хүүхдийн сурах сэтгэхүйд нөлөөлөхөөс гадна багш, ажилчид, эцэг эхчүүдэд ч таатай сэтгэгдэл төрүүлж байгаа юм. Тиймээс бусад бага сургууль ч мөн бүх анги танхимдаа тохижилт хийдэггүй юм аа гэхэд нэг анги, давхрыг уламжлалт ёс заншлыг сурталчлах тохижилт хийх нь зүйтэй болохыг иргэд мөн цахим хуудастаа бичжээ.