• Цахим орчинд хүний эрхийг хамгаалах хуульд хориг тавьж байгаа талаар Ерөнхийлөгчийн Тамгын газраас өнөөдөр /2023.01.30/11:00 цагаас мэдээлэл хийлээ.

ЕТГ-ын дарга Я.Содбаатар:

-Монгол Улсын Ерөнхийлөгч У.Хүрэлсүх Үндсэн хуульд заасан бүрэн эрхийнхээ хүрээнд УИХ-аас Олон нийтийн сүлжээнд хүний эрхийг хамгаалах тухай хууль болон Харилцаа холбооны тухай хуульд нэмэлт өөрчлөлт оруулах тухай, Кибер аюулгүй байдлын тухай хуульд нэмэлт өөрчлөлт оруулах тухай, Хүний хувийн мэдээллийг хамгаалах тухай хуульд нэмэлт өөрчлөлт оруулах тухай, Татварын ерөнхий хуульд нэмэлт өөрчлөлт оруулах тухай, Монгол Улсын хуулиудын 2023 оны нэгдүгээр сарын 20-ны өдөр УИХ эцэслэн баталсан хуулиудад бүхэлд нь хориг тавьж байна.

Ардчилсан Монгол Улсын Ерөнхийлөгчийн хувьд ардчилал хүний эрх, эрх чөлөөг хамгаалагчийнхаа хувьд энэ хуульд бүхэлд нь хориг тавих шийдвэрийг гаргасан.

Хүний эрхийг дордуулж, хүний эрх, эрх чөлөөтэй холбоотой аливаа хуулийн заалтууд дээр бид бүхэн хамгаалах чиглэлд тодорхой бодлого гаргаж, хуулийн хүрээнд дэмжих ёстой. Нөгөө талдаа, Монгол Улсад мөрдөгдөж буй хуулийг хэлэлцэн батлахдаа тухайн эрх ашиг нь хөндөгдөж буй хуулийн этгээд, эрдэмтэн судлаач, ард иргэдийн оролцоог гүйцэт хангаж, санал бодлыг нь авч, батлах ёстой.

Монгол Улсад хүчин төгөлдөр мөрдөгдөж буй хуулиар Ерөнхийлөгч чуулган завсарлагааны үед хориг тавьбал дараагийн чуулганы эхний 14 хоногт хуулийн хоригийг хэлэлцэх ёстой. Нэг ёсондоо гуравдугаар сарын 15-нд хаврын чуулган эхэлнэ.

Хоригийг нийт гишүүдийн гуравны нэгээр хүлээн авдаг. Тэгэхээр хоригийг хүлээж авах, авахгүй нь УИХ-ын бүрэн эрхийн асуудал. Энэ хуульд бүхэлд нь хориг тавьж байгаа учраас хэрэгжиж эхлэх хугацаа буюу хоёрдугаар сарын 1-нээс түдгэлзэнэ.

"ЕРӨНХИЙЛӨГЧИЙН ҮНДСЭН ХУУЛИАР ОЛГОГДСОН ҮНДСЭН БҮРЭН ЭРХЭД ХАЛДАХ БАЙДЛААР ЗОХИЦУУЛСАН"

Ерөнхийлөгчийн Хууль зүйн бодлогын зөвлөх А.Бямбажаргал:

-УИХ-аас 2023 оны нэгдүгээр сарын 20-нд Олон нийтийн сүлжээнд хүний эрхийг хамгаалах тухай хууль болон түүнийг дагалдах нэр бүхий дөрвөн хуульд нэмэлт өөрчлөлт оруулах байдлаар баталсан. Энэ хуулиудыг УИХ-ын дарга Г.Занданшатар УИХ-ын хуралдааны дэгийн тухай хуульд заасны дагуу 2023 оны нэгдүгээр сарын 25-нд ёсчилж, улмаар УИХ-ын ерөнхий нарийн бичгийн даргаас ЕТГ-т нэгдүгээр сарын 26-ны өдөр ирүүлсэн. Өөрөөр хэлбэл,эдгээр зүйлсийг ирүүлсний дараагаар холбогдох хууль тогтоомжид заасны дагуу хориг тавих бүрэн эрх хэрэгжиж эхэлдэг. Энэ хүрээнд Монгол Улсын Ерөнхийлөгч нэр бүхий хуулиудад бүхэлд нь хориг тавьж байна. Хуулийг хүлээн авснаас хойш ажлын тав хоногт буюу хоёрдугаар сарын 1-ний өдөр хориг тавих сүүлийн хугацаа дуусна. Тэгвэл энэ хуулийн дагаж мөрдөх хугацааг батлахдаа 2023 оны хоёрдугаар сарын 1-нд буюу Ерөнхийлөгчийн хориг тавьж болох Үндсэн хуулиар олгогдсон үндсэн бүрэн эрхэд халдах байдлаар зохицуулсан байна.

• Засгийн газраас 2023 оны нэгдүгээр сарын 18-нд хуулийг УИХ-ын даргад өргөн мэдүүлсэн. Хэлэлцэж эхэлснээс хойш хоёр хоногийн дотор уг хуулиудыг эцэслэн баталсан. Иргэд олон нийтийн оролцоог хангаагүй, саналыг аваагүй. Мөн Үндсэн хуулийн 26 хэсгийн хоёр дахь хэсэгт заасан иргэн, байгууллага, бусад хуулийн төслийн талаар хууль санаачлагчид уламжилна. Хууль тогтоомжийн тухай хуулийн 8 зүйлийн 8.1.5 болон 8.1.6, 38 дугаар зүйлийг тус тус зөрчсөн.
• Ийнхүү хууль зөрчиж байгаа нь Үндсэн хуулийн 1 зүйлийн хоёр дахь хэсэгт заасан "Ардчилсан ёс, үндэсний эв нэгдлийг хангах, хууль дээдлэх нь төрийн үйл ажиллагааны үндсэн зарчмыг зөрчиж байна.
• Үндсэн хуулийн 19.1 зүйлд "Төрөөс хүний эрх, эрх чөлөөг хангахуйц эдийн засаг, нийгэм, хууль зүйн бусад баталгааг бүрдүүлэх, хүний эрх, эрх чөлөөтэй тэмцэх, хөндөгдсөн эрхийг сэргээн эдлүүлэх үүргийг иргэнийхээ өмнө хүлээдэг. Мөн Үндсэн хуулийн 19 зүйлийн гуравт "Хүн эрх, эрх чөлөөгөө эдлэхдээ үндэсний аюулгүй байдал, бусад хүний эрхийг хохироож, нийгмийн хэв журмыг гажуудуулж болохгүй гэж тусгасан.