АНУ-ын Сангийн яам Пүрэв гаригт "Вагнер" группийг үндэстэн дамнасан томоохон гэмт хэргийн бүлэглэлд тооцож, хэд хэдэн хориг арга хэмжээ авчээ. АНУ-ын Төрийн нарийн бичгийн дарга Энтони Блинкен "Вагнер"-ын гол дэд бүтцүүдэд, тэр дундаа суртал ухуулгын байгууллага, фронтын компаниудад ашигладаг нисэхийн фирмд чиглэсэн хэд хэдэн хориг арга хэмжээг нэгэн зэрэг зарласан. Путин өөрийн сонгосон дайнаа үргэлжлүүлэхийн тулд "Вагнер" группт найдаж байна. Тус групп мөн Африкийн улс орнуудад тогтворгүй байдал бий болгож, хүний ​​эрхийг зөрчиж, ард түмнээс нь байгалийн баялгийг булаан авч байна” гэж хэлжээ.

Түүнчлэн тэрбээр Украин дахь дайнтай холбоотой олон тооны хувь хүн, компаниудын эсрэг хориг арга хэмжээ авахаа мэдэгдэв. Үүнд Москвагийн батлан ​​хамгаалах аж үйлдвэрийн цогцолбортой холбоотой хэд хэдэн хувь хүн, компани, мөн Путины холбоотон болон тэдний гэр бүлийн гишүүд, Украины зарим хэсгийг ОХУ-д нэгтгэх оролдлоготой холбоотой хоёр хүн, Оросын хоригдлуудыг "Вагнер"-ын бүлэгт элсүүлэхэд тусалсан гурван хүн багтаж байна. Мөн Украины бүрэн эрх, нутаг дэвсгэрийн бүрэн бүтэн байдал, улс төрийн тусгаар тогтнолд заналхийлсэн, зөрчсөн үйлдэл хийсэн ОХУ-ын цэргийн 531 албан тушаалтанд визний хязгаарлалт тогтоох арга хэмжээ авахаа мэдэгдэв.

"Вагнер" групп болон түүний удирдагч Евгений Пригожинтэй холбоотой компаниудын дунд “Terra Tech” хувьцаат компани багтсан. “Terra Tech" нь идэвхтэй хиймэл дагуулаас авсан сансрын зураг, агаараас авсан зураг нийлүүлдэг Орост төвтэй технологийн компани юм. Эдгээр зургийг "Вагнер"-ын Украин дахь байлдааны ажиллагааг дэмжих зорилгоор цуглуулсан гэж АНУ-ын Сангийн яам мэдэгдэв.

Эх сурвалж: CNN