Хөгжлийн банк нь 2023 оны нэгдүгээр сарын 23-нд Евро бондоос хугацаанаас нь өмнө нийт 51.6 сая ам.долларын бондыг хэсэгчлэн худалдан авлаа. Ингэснээр Евро бондын төлбөрт төлөх 500 сая ам.долларын 51.6 сая ам.доллар нь хасагдаж, 448.4 сая ам.долларын үлдэгдэлтэй болж байна.

Худалдаж авсан бонд нь 86.69 жигнэсэн дундаж үнэтэй, жилийн 22.55 хувийн өгөөжтэй нийт 516,140 ширхэг.  Банк нь ширхэг бүрийг 100.0 ам.доллар дээр төлөх өрийг 86.69 ам.долларт худалдан авснаар одоогийн эзэмшиж байгаа багцын хүрээнд нийт 11 орчим сая ам.доллар хэмнэлээ. Тодруулбал, зөвхөн хүүгийн зардалд Евро бондын эргэн төлөлтийг хийх хугацаа буюу 2023 оны аравдугаар сарын 23-ны өдөр хүртэл 4.2 сая ам.доллар хэмнэх юм байна.

Сануулахад, Хөгжлийн банк нь 2018 онд нийт 500.0 сая ам.долларын дүнтэй, 7.25 хувийн хүүтэй Евро бондыг олон улсын зах зээлд арилжаалсан аж. Төлөөлөн удирдах зөвлөлийн хурлын 2022 оны шийдвэрээр банкны өр төлбөрийг багасгах зорилгоор Евро бондоос худалдан авч бондыг хэсэгчлэн хугацаанаас нь өмнө хүчингүй болгох шийдвэрийг гаргасан юм байна. Дээрх шийдвэрийн хүрээнд энэхүү худалдан авалт хийгджээ.

Г.ХОРОЛ