НҮБ-ын Ерөнхий нарийн бичгийн дарга Антонио Гутерриш Давост Дэлхийн эдийн засгийн чуулга уулзалтад оролцохдоо багагүй гутранги үзэл бодолтой байгаагаа илэрхийлжээ.

Тэрбээр “Дэлхийн эдийн засаг томоохон хямралын ирмэг дээр ирээд байна. АНУ, БНХАУ-ын хоорондын хурцадмал байдал дэлхийг баруун, зүүнээр хуваагдахад хүргэсэн. Хүн төрөлхтөн тахал өвчнөөс "сургамж” аваагүй бөгөөд Украин дахь мөргөлдөөн дуусах болоогүй байна” гэж мэдэгдэв.

Антонио Гутерриш дэлхийн өнөөгийн нөхцөл байдлыг өөрийн амьдралын "хамгийн муу үе” гэж нэрлэжээ. 1949 онд төрсөн Ерөнхий нарийн бичгийн даргыг уур амьсгалын өөрчлөлт, геополитикийн хурцадмал байдал зэрэг олон асуудал ийм мэдэгдэл хийхэд хүргэсэн байна.

Түүний бодлоор өнөөгийн байдал "хүйтэн дайны үеийнхээс ч дор" байгаа аж. Учир нь "мөргөлдөөнийг хяналтаас гаргахгүй байх механизм бараг үгүй" болжээ. Тэрбээр "Манай дэлхий хэд хэдэн фронтод ‘төгс шуурга’-тай тулгарч байна” гээд, нийлүүлэлтийн сүлжээний тасалдал, эрчим хүчний хямрал, үнэ, инфляци, зээлийн хүүгийн өсөлтийг онцлон тэмдэглэсэн байна.

Гутерриш дэлхийн эдийн засаг Covid-19 цар тахлын сөрөг нөлөөг мэдэрсэн хэвээр буйг хэлжээ. Мөн дэлхий "эрүүл мэндийн асуудлаар сургамж аваагүй", ирээдүйд учирч болзошгүй эрсдэлүүдэд "бэлтгэлгүй" хэвээр байгааг тэмдэглэсэн байна.

Тэрбээр дэлхий дахин нэгдмэл бус байгаа нь "хүний ​​эрхийг хамгаалах, бүс нутгийн аюулгүй байдлын асуудал" зэрэг олон сэдвээр санал зөрөлдөөнтэй буй АНУ, БНХАУ-ын хоорондын хурцадмал байдлаас үүдэлтэйг тэмдэглэжээ. Гуттериш өмнө нь Украины мөргөлдөөнийг зохицуулахад зуучлагчийн үүрэг гүйцэтгэхэд бэлэн буйгаа мэдэгдэж байсан бол өдгөө "Хоёр талын яриа хэлэлцээг ахиулахад зуучлах ямар ч боломжгүй" гэж хэлсэн байна.

Үүний зэрэгцээ тэрбээр НҮБ мөргөлдөөнд оролцогч талуудтай хүнс, бордоо экспортлох, энгийн иргэдэд туслах, хоригдлууд солилцох, цөмийн байгууламжийн аюулгүй байдлыг хангах зэрэг тодорхой асуудлаар хамтран ажилласаар байгааг онцолжээ.

Эх сурвалж: BBC, TASS, GLOBAL HERALD