Оросоос Украины эсрэг өргөн цар хүрээтэй дайн хийгээд жилийн ойтойгоо золгож байхад Москвагийн ерөнхийлөгч Владимир Путиныг амьд байгаа эсэх талаар Кремль, Украины удирдагч нар хачирхалтайгаар маргалдав.

Украины Ерөнхийлөгч Владимир Зеленский Давосын чуулганд оролцогчдод хандан Оросын удирдагч эсэн мэнд байгаа гэдэгт эргэлзэж буйгаа  хэлснээр маргаан эхэлсэн юм.

Зеленский хэлэхдээ, “Би хэнтэй, юуны талаар ярихаа сайн ойлгохгүй байна. Заримдаа дэлгэцний нөгөө талд байгаа хүнийг Оросын ерөнхийлөгч мөн гэдэгт би эргэлзэж байна. Тэр амьд байна уу, тэр шийдвэр гаргаж байна уу, ер нь тэнд хэн шийдвэр гаргаж байгааг би сайн ойлгохгүй байна” гэж мэдэгджээ.

Хариуд нь Кремлийн хэвлэлийн төлөөлөгч Дмитрий Песков Оросын удирдагчийн биеийн байдлыг бодитой тайлбар хэлэлгүйгээр дургүйцлээ илэрхийлэв. Песков хэлэхдээ, “Зеленский Орос ч, Путин ч байхгүй байхыг илүүд үзэх нь ойлгомжтой. Орос улс оршин тогтнож байгаа, цаашид ч  оршин тогтнох болно гэдгийг хэдий чинээ хурдан ухаарах тусам Украин гэх мэт улсад сайн” гэж мэдэгджээ.

Путин сүүлийн 10 жилд анх удаа жилийн эцсийн хэвлэлийн бага хурлаа Холбооны Ассемблэйд хийх уламжлалт үгийнхээ хамт цуцалсан. Эдгээр нь жил бүрийн арванхоёрдугаар сард болдог байв.

Зеленский фронтын хамгийн аюултай газруудаар явж нөхцөл байдалтай танилцаж байхад Оросын ерөнхийлөгчийг бункерээсээ видео холбоосоор дамжуулан олон төрлийн уулзалт, чухал арга хэмжээнд оролцсон гэж олон нийтийн сүлжээгээр дооглон бичиж байна.

Путин энэ долоо хоногт Санкт-Петербургт аялж, хэд хэдэн арга хэмжээнд оролцож, олны өмнө гарах байсан ч Кремль өчигдөр Оросын удирдагч Ортодокс Христийн шашны баярыг тохиолдуулан мөсөн усанд шумбсан тухай мэдэгдсэн нь Путины эрүүл мэндийн талаарх эргэлзээг улам нэмэгдүүлэв. Учир нь Путины талаар нэг ч зураг, бичлэгийг Кремль цацаагүй байна. Энэ талаар “Энэ удаад зураг, бичлэг байхгүй. Тэр уламжлалаа дагасан гэдгийг бид танд мэдэгдэж байна” гэж Песков хэлжээ.

ЭХ СУРВАЛЖ: DAILY BEAST