УИХ-аас баталсан “Коронавируст халдвар /ковид-19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай” хуулийн хүрээнд Монголбанкнаас дотоодын алт олборлогч аж ахуйн нэгжүүдэд арилжааны банкуудаар дамжуулан санхүүжилт олгосон.

Энэ хүрээнд өнгөрсөн онд нийт 50 орчим тэрбум төгрөгийн санхүүжилт олгожээ. Дээрх хуулийн хэрэгжих хугацаа 2022 оноор дуусгавар болсон тул Монголбанкнаас энэ төрлийн арга хэмжээнд санхүүжилт олгох эрх зүйн боломжгүй болсон байна.

Монголбанк өнгөрсөн 2022 онд нийтдээ 22.9 тонн үнэт металл дотоодын аж ахуйн нэгжүүдээс худалдаж авчээ. Энэ нь 2021 онтой харьцуулбал 10 орчим хувиар өссөн үзүүлэлт аж.

Төв банк 2023 онд үнэт металлын худалдан авалт өмнөх оныхоо түвшинд хадгалагдана гэсэн хүлээлттэй байна. Алт олборлогч аж ахуйн нэгжүүд үндсэн орд руу чиглэсэн олборлолт хийж эхэлсэн тул цаашид олборлох алтны хэмжээ нэмэгдэх төлөвтэй байгаа аж.