3,415.19
Ц.Хуланг цагдан хорих эсэхийг хэлэлцэж байна
Нэмэлт:
Энэхүү баривчилгааны талаар Хууль зүй, дотоод хэргийн сайд Х.Нямбаатар хэвлэлийнхэнд байр сууриа илэрхийллээ. Тэрбээр "Энэ асуудлаар ТЕГ-ын дарга П.Одонбаатартай утсаар холбогдсон. Яруу найрагч Ц.Хуланг баривчилсан асуудлыг тодруулахад манай харъяаллын хэрэг дээр шалгах шаардлага үүссэн тул баривчилсан. Эрүүгийн хуульд заасан Төрийн эсрэг гэмт хэрэгт холбогдуулан шалгаж байгаа гэсэн" гэв.
Ц.Хуланг үргэлжлүүлэн хорих эсэхийг хэлэлцэж байна
Яг одоо Сүхбаатар дүүргийн Эрүүгийн хэргийн анхан шатны шүүхэд яруу найрагч Ц.Хуланг цагдан хорих хүсэлтийг хэлэлцэж байна. Шүүх хурал 16.00 цагт эхэлсэн юм. Түүнийг гадаадын тагнуулын байгууллагуудтай хамтран төрийн эсрэг гэмт хэрэг үйлдсэн байж болзошгүй үндэслэлээр өчигдөр баривчлан саатуулаад байсан юм.
Ц.Хуланг саатуулсан нь үнэн гэв
Яруу найрагч, зохиолч Ц.Хуланг тагнуулын байгууллагаас 461 дүгээр хорих ангид 48 цаг саатуулсан нь үнэн гэдгийг албаныхан мэдээллээ. Түүнийг 2017 онд Монгол Улсын Ерөнхийлөгч Х.Баттулга захирамж гаргаж, Соёл, шашны бодлогын зөвлөхөөр томилж байв.
Эрүүгийн хэргийн 19.4 дүгээр зүйл.Гадаадын тагнуулын алба, байгууллага, иргэнтэй хууль бусаар хамтран ажиллах заалтад "Монгол Улсын иргэн гадаад улсын тагнуулын албатай хамтран ажиллахаар тохиролцсон, хамтран ажилласан; гадаадын байгууллага, иргэнд шилжүүлэн өгөх зорилгоор төрийн нууцад хамаарах мэдээ, баримт, эд зүйлийг хулгайлсан, цуглуулсан, хадгалсан, дамжуулсан бол найман жилээс 15 жил хүртэл хугацаагаар хорих ял шийтгэнэ.
Энэ гэмт хэргийг төрийн өндөр албан тушаалтан, төрийн нууцыг итгэмжлэгдэн хариуцсан, албан тушаал, ажил үүргийн хувьд мэдсэн этгээд үйлдсэн бол 12 жилээс 20 жил хүртэл хугацаагаар, эсхүл бүх насаар хорих ял шийтгэнэ.
Тайлбар нь гадаад улсын тагнуулын албатай хамтран ажиллахаар тохиролцсон боловч төрийн зохих байгууллагад сайн дураараа даруй мэдэгдсэн, учирч болзошгүй хохирлоос урьдчилан сэргийлэхэд туслалцаа үзүүлсэн иргэний үйлдэл нь өөр гэмт хэргийн шинжгүй бол ялаас чөлөөлнө" гэж заасан.
Яруу найрагч Цоодолын Хулан нь:
- Монгол үндэстэн зохиолчдын холбооны тэргүүн
- Дэлхийн утга зохиол судлалын төвөөс тодруулсан ХХ зууны дэлхийн шилдэг 100 яруу найрагчийн нэг болж тус төвийн өргөмжлөлийг 2009 онд хүртсэн.
- Ганжуур, Данжуур хөлгөн судрыг орчуулах төслийн ТУЗ-ийн гишүүн
- ОХУ-ын Санкт-Петербург хотын Дорно дахины институтэд “Буддын шашны утга зохиол дахь багш шавийн дүр” сэдвээр эрдмийн зэрэг горилсон.
- Улсын Хүүхэлдэйн театрын захирлаар ажиллаж байсан.
- Яруу найраг, орчуулга, нийтлэлийн арав гаруй ном хэвлүүлсэн.
- Орос, англи хэлтэй.
Ц.Хулангийн өмгөөлөгч шүүгчээс татгалзаж, хойшиллоо
Сүхбаатар дүүргийн Эрүүгийн хэргийн анхан шатны шүүхэд яруу найрагч Ц.Хуланг цагдан хорих хүсэлтийг хэлэлцсэн бөгөөд Ц.Хулангийн өмгөөлөгч шүүгчээс татгалзах хүсэлт гаргасан учраас шүүх хурал тодорхойгүй хугацаагаар хойшиллоо. Сүхбаатар дүүргийн Эрүүгийн хэргийн анхан шатны шүүхийн ерөнхий шүүгч татгалзлыг нь шийдэж байж хурлын товыг товлох юм.
Холбоотой мэдээ