Японы засгийн газар 2023 оны дөрөвдүгээр сараас эхлээд хөдөө рүү нүүж буй айл өрхүүдэд хүүхэд тутамд нь нэг сая иенийн тэтгэмж олгох болжээ. Гэхдээ нэг гэр бүлд олгох тэтгэмжийн дээд хэмжээ таван сая иен байх юм. Өмнө нь энэ тохиолдолд 700 мянган иен олгодог байсан. Мэдээж уг тогтолцооны гол зорилго нь Токиогийн хэт төвлөрлийг бууруулж, хөдөө орон нутгаарх зэлүүд бүс нутгийг хөгжүүлэх юм.

Таван сая иен их мөнгө шиг сонсогдох боловч орон гэртэй болох, ажил, нийгмийн харилцаагаа товхинуулах гээд шинэ газарт очсон хүнд зардал мундахгүй.

Шийдвэрийг арванхоёрдугаар сард зарласан. Хотод ажиллаж, амьдардаг залуус шинэ жилийн баярыг тохиолдуулан хөдөө рүү гэртээ харих үеийг тохиолдуулан энэ шийдвэрээ зарласан нь учиртай ажээ. Гэхдээ Японы засгийн газар 70 жилийн өмнөөс л хот, хөдөөгийн хүн амыг тэнцвэржүүлэх тал дээр арга хэмжээ авах гэж хичээсээр ирсэн.

Уг шийдвэрийн хамрах хүрээ нь Токиогийн 23 тойргоос гадна хөрш зэргэлдээ Чиба, Сайтама, Канагава мужуудын иргэдэд хамаатай. Тэтгэмж тогтоосноор жилд 10 мянга орчим хүн хөдөө рүү нүүнэ гэж засгийн газар тооцоолж байна. Тэтгэмж авахад тодорхой нөхцөл бий. Айл өрхөөс дор хаяж нэг хүн шинэ нутагтаа бизнес эрхлэх, эсвэл тэндээ жижиг, дунд үйлдвэрт ажилд орох ёстой. Мөн тухайн газартаа дор хаяж таван жил оршин суух ёстой. Эс бол тэтгэмжийн мөнгөө эргүүлж төлөх юм байна.

Хөдөө рүү нүүлгэн шилжүүлэхийн тулд иргэддээ тэтгэмж олгож буй газар нь ганцхан Япон биш юм. Ирланд улс 2021 онд “Бидний хөдөөгийн ирээдүй” төслийн хүрээнд 68 мянган төрийн албан хаагчийг Дублин хотоос хөдөө рүү нүүлгэж байв.

Эх сурвалж: JAPAN TODAY