Бөхийн эргэн тойронд өнгөрсөн өдрүүдэд олон үйл явдал тохиолоо.

ҮНДСЭН ХУУЛИЙН БАРИЛДААНД УЛСЫН АРСЛАН Э.ОЮУНБОЛД ТҮРҮҮЛЛЭЭ

Үндсэн хууль батлагдсаны 31 жилийн ойд зориулсан улс, аймгийн алдар цолтой бөхчүүдийн эхний барилдаанд 128 бөх барилдсанаас Хэнтий аймгийн Өмнөдэлгэр сумын харьяат, “Хан-Хэнтийн аварга” дэвжээний бөх, улсын арслан Э.Оюунболд түрүүлж, Завхан аймгийн Яруу сумын харьяат, “Хилчин” спорт хороо, “Жем интернэшнл” ХК, “Даян” дэвжээний бөх, улсын заан М.Лхагвагэрэл үзүүрлэв.

Их шөвгийн дөрөвт Архангай аймгийн Булган сумын харьяат, “Алдар” спорт хороо, “Алтан Дорнод” ХХК, “Бөхбилэгт” дэвжээний бөх, улсын арслан Р.Пүрэвдагва, Сэлэнгэ аймгийн Мандал сумын харьяат, “Аврагч” спорт хороо, “Мон зол” ХХК, “Таван-Хан” дэвжээний бөх, улсын начин Н.Баярбаатар нар шалгарлаа.

Дунд шөвгийн наймд улсын начин Э.Даш, улсын начин Б.Даваа-Очир, аймгийн хурц арслан Б.Баянмөнх, аймгийн арслан Т.Дүүрэнсаран нар үлдэв.

ЧӨЛӨӨТ БӨХИЙН АНХДУГААР ЛИГИЙН ТЭМЦЭЭН ЭХЭЛЛЭЭ

Өсвөр, залуу бөхчүүдийн ур чадварыг ахиулах, дэлхийн дэвжээнд өрсөлдөхөд бэлдэх, клубуудын үйл ажиллагааг дэмжих зорилго бүхий чөлөөт бөхийн U17, U22 насны анхдугаар лигийн тэмцээн Чингэлтэй дүүргийн "Хайрхан" хөгжлийн төвийн спорт зааланд эхэллээ.

Монголын чөлөөт бөхөд урьд өмнө нь байгаагүй шинэлэг хэлбэрийн тус лигийн U17 насны ангилалд “Алдар” спорт хороо, Спортын төв сургууль, 73-р сургууль, Баянгол дүүрэг, “Аваргууд” академи, Төв-Арж, Налайх дүүрэг, "Төгс” дэвжээ, “Хасу-Мегастарс” клуб, “Тэх Мөнх”, "Цаст тайга" клуб гэсэн 10, U22 насанд “Алдар” спорт хороо, Спортын төв сургууль, 73-р сургууль, Сонгинохайрхан дүүргийн "MJ" клуб, Төв-Арж, Налайх дүүргийн “Голомт” цогцолбор, “Төгс”, “Хасу-Мегастарс”, “Тэх Мөнх” клуб гэсэн есөн баг тойргийн журмаар өрсөлдөж байна.

Гуравдугаар сарын 4-нийг хүртэл үргэлжлэх энэхүү лиг нь долоо хоног бүрийн Баасан гаригт зохион байгуулагдах бөгөөд эхний өдөр 17 насны хоёр, 22 насны нэгдүгээр тойргийн халз барилдаан болсон юм.

ЦУУ АЛДАРТ Х.ЦАГААНБААТАР ЗОДОГ ТАЙЛЛАА.

2023 оны Жүдо бөхийн насанд хүрэгчдийн улсын аварга шалгаруулах тэмцээн өнгөрөгч өдрүүдэд болов. Тэмцээний үеэр хөдөлмөрийн баатар, гавьяат тамирчин, олимп, дэлхийн медальтан Х.Цагаанбаатар зодог тайллаа.

Тэрбээр энэ жил -90 кг-д зодоглон хүрэл медаль хүртсэн юм. Зодог тайлсан талаараа Х.Цагаанбаатар “Хорин хоёр жилийн золтой өдрүүдийн хором бүрт надтай хамт байж дээлийн минь захыг мушгиж уухайлсан дэндүү өгөөмөр Ард түмэн та бүхэндээ баярлалаа. Өнөөдөр албан ёсоор дэвжээндээ хүндэтгэл үзүүлж санаа амарлаа. Баярлалаа,  жүдо баярлалаа. Хамтын хүч, амжилт. Амжилтын төлөө хамтдаа” гэжээ.

Өдгөө 38 настай түүний хувьд 2004 оны Афины олимпоос мөнгө, 2009 оны Роттердамын дэлхийн аваргаас алтан медаль тус тус хүртэж байв.