Ойрын өдрүүдэд цаг агаар дулаарч, өдөртөө цас хайлан урсч, гудамж талбай болоод авто замын халтиргаа гулгаа ихэсч, автомашинууд хоорондоо шүргэлцэх, явган яваа хүн халтирч унаад гэмтэх тохиолдол цөөнгүй гарчээ. Сурагчдын амралт эхэлсэн цагаас хойш гэмтэл бэртэл авч түргэн тусламж авах хүүхдүүдийн тоо эрс нэмэгдсэн байна.

Халтиргаа гулгааны улмаас үүсэн гэмтлийн талаар ГССҮТ-өөс тодрууллаа. Тус төвийн ээлжийн эмч хэлэхдээ “Өдөрт манай яаралтай хүлээн авах түргэн тусламжийн тасгаар 300-400 хүн үйлчлүүлж байгаагийн ихэнх хувь нь хүүхдүүд байна. Тусламж үйлчилгээ авах иргэдийн ачаалал өглөө ажил эхлэх болон орой ажил тарах цагаар эрс нэмэгддэг. Сурагчдын амралт эхэлсэн цагаас хойш гэмтэл бэртэл авсан хүүхдүүдийн тоо эрс нэмэгдсэн. Амралтын өдрүүдээр хүүхэд, багачууд зориулалтын бус чаргаар хад, чулуу бартаатай замаар гулгаснаас үүдэн бэртэл авч байна.

Бага насны хүүхдүүдэд хэрэглүүлж буй цана, чарга болон гулгуулж байгаа зам талбайгаа аюул осол гарах талаас нь анхаарах хэрэгтэй. Энэ жил цас их орсноос үүдэн халтиргаа гулгааны улмаас тусламж, үйлчилгээ авч байгаа хүний тоо өмнөх жилүүдээс эрс их байна. Өмнөх оны халтиргааны улиралд 2021-2022 онд 1.269 хүнд цас, мөсөн дээр халтирч унасан гэх гэмтлийн шалтгаанаар тусламж, үйлчилгээ үзүүлсэн юм. Харин 2022 оны аравдугаар сараас арванхоёрдугаар сарын 31-нийн хүртэлх хугацаанд 3709 хүн гэмтэж бэртсэн шалтгаанаар эмнэлгийн тусламж үйлчилгээ авсан байна” гэлээ.

Улсын хэмжээнд гэмтлийн тасгаар өчигдөр /2022.01.12/-ийн тоон мэдээллээр:

• Хаяттасгаар үйлчлүүлсэн хүний тоо 327
• Амбулаторын үзлэгийн тоо 432
• Хэвтэн эмчлүүлэгчийн тоо 405
• Нийт мэс заслын тоо 66 байна.

Б.НАРАНГОО