Орос, Украины дайн сүүлийн өдрүүдэд Бахмутын хойд хэсгийн Соледар хотод үргэлжилж байна. Тулааны явц аль талдаа илүү байгааг хоёр улс өөр өөрийнхөөрөө баталж буй.

ОХУ-ын Батлан хамгаалах яамны хэвлэлийн төлөөлөгч Игорь Конашенковын хэлснээр тус улсын Агаарын цэргийн хүчнийхэн Соледарыг хойд болон өмнөд талаас нь бүсэлсэн аж. Хот доторх тулаанд цэргүүд оролцож байгаа гэж Конашенков хэлээд Вагнер бүлэглэлийнхнийг огт дурдаагүй. Гэвч Батлан хамгаалах яамны мэдэгдэл Вагнер хөлсний бүлэглэлийн мэдэгдэлтэй зөрчилджээ. Тодруулбал, “Вагнерын дайчид Соледарт бүрэн хяналтаа тогтоосон. Зөвхөн Вагнерын цэргүүд энэ тулаанд оролцсон” гэж бүлгийн тэргүүн Евгений Пригожин сайрхсан мэдэгдэл хийжээ. Пригожин зориудаар Вагнерын нэр хүндийг өсгөхийн тулд ингэж мэдэгдсэн байх магадлалтай.

Тэгвэл Украины Батлан хамгаалах яамны мэдэгдэлд дурдсанаар, Вагнер бүлэглэлийнхэн хамгаалалтыг эвдэж чадаагүй аж.

Шинжээчид ОХУ-ын арми болон Вагнер бүлэглэлийн хооронд үүссэн хурцадмал байдлын талаар эртнээс ярьсан. Вагнер бүлэглэлийн тэргүүн Евгений Пригожин ч Украины генералуудыг дайны бодит байдлаас хол байна гэж удаа дараа шүүмжилжээ. Украинд тулалдаж буй хүчний дийлэнхийг Вагнерын цэргүүд бүрдүүлж байгааг Украин болон АНУ-ын албаныхан мэдэгдсэн.

Эрх мэдлийн хонгилд хэрүүл тэмцэл өрнөж буй эсэхийг батлахад бэрх ч зарим нэг сэжүүр бий. Тухайлбал, ОХУ-ын Хуурай замын цэргийн штабын даргаар хурандаа генерал Александр Лапиныг томилжээ. Энэ нь “цэргийнхэнтэй хутгалдах хэрэггүй” гэсэн анхааруулгыг Пригожинд өгч буй томилгоо гэж эх сурвалж хэллээ.

Эх сурвалж: BBC