Хууль зүйн сайд Х.Нямбаатар "Эрүүгийн цагдаагийн газраас хойшлуулашгүй ажиллагаа явуулж, УБТЗ-ын албан тушаалтан Б гэдэг хүний гэрээс болон түүний хамаарал бүхий этгээдүүдийн гэрээс 7.3 тэрбум төгрөгийг хураан авч, иргэн Б-г баривчилсан. Үүнээс гадна дөрөв гаруй тэрбум төгрөгийн үл хөдлөх хөрөнгийг олж авсан хэргийг шалгаж байна. Түүний тухайд УБТЗ-д олон жил ажилласан. Одоо ч мөн Тээвэр зохицуулалтын газарт ажилладаг гэх урьдчилсан мэдээлэл байна" гэж сүртэй мэдэгсэн. Харин амралтын өдрүүдэд мөнөөх албан тушаалаа ашиглаж, авлига авсан гэгдэж байсан С.Батдөлийг нь шүүх суллаад явуулчихсан талаарх мэдээ иргэдийг бухимдуулав. "Монголын шүүх авлигачдын талд байна", "Албан тушаалтны заавраар хөдөлж байна" гэхчилэн зүхэв. Гэтэл түүнийг баривчлах асуудлыг шүүхээр шийдээгүй байсан бөгөөд яллагдагчийн өмгөөлөгч Д.Амаржаргал “Төв аймагт шүүх хуралд ороод дуусч байна, цагдан хорих таслан сэргийлэх арга хэмжээ авах тухай шүүхийн хэлэлцүүлэгт өөрийн биеэр заавал оролцоно, шүүхийн хэлэлцүүлгийг хойшлуулж өгнө үү” гэсэн хүсэлт гаргажээ. Үүнийг харгалзан үзэж шүүх хурлыг хойшлуулсан байна.