АНУ-ын Сан Франциско дахь Монголын уран нугаралтын төвийн уран бүтээлчид өнөөдөр/2023.01.03/ NBA-ийн талбайд үзүүлбэрээ толилуулжээ. Тодруулбал, Голден Стэйт Уорриорс баг өөрсдийн Чейз центртээ Атланта Хавкс багийг хүлээн авч тоглож байгаа бөгөөд тоглолтын эхлэлд Монголын уран нугаралтын тоглолт болжээ.

Энэ талаар тус төвийн цахим хуудаснаа “Монгол Улсын Гадаад харилцааны яам, Сан Франциско хот дахь Ерөнхий консулын газар, Бэй Аэриагийн монголчуудын холбоо, Монгол уран нугаралтын төв хамтран сагсан бөмбөгөөр дамжуулан соёл урлагаа сурталчлах зорилгоор 2023 оны нэгдүгээр сарын 2-ны өдөр Америкийн үндэсний сагсан бөмбөгийн холбооны лигийн аварга баг “Golden State Warriors” багийн “Atlanta Hawks” багтай хийх тоглолтын салхийг хагалан, монгол уран нугаралтын гайхамшгийг дэлхийн сая сая хүмүүст үзүүлэх гэж байна. Түүхэн энэ үйл явдлын гэрч болохоор 100 гаруй тасалбарыг худалдан авсан монголчууддаа баярлалаа” гэжээ.

Мөн тоглолт эхэлсэнийг зарлан, тоглолтын цан цохих хүндтэй үүргийг Монгол Улсаас Сан Франциско хотод суугаа Ерөнхий консул Б.Ургамалцэцэг гүйцэтгэсэн аж.