Монгол, Вьетнам хоёрын дипломат харилцааны тулгуур нь Батлан хамгаалах салбар

Хуучирсан мэдээ: 2022.12.26-нд нийтлэгдсэн

Монгол, Вьетнам хоёрын дипломат харилцааны тулгуур нь Батлан хамгаалах салбар

Монгол, Вьетнам хоёрын дипломат харилцааны тулгуур нь Батлан хамгаалах салбар
Монгол Улсын Засгийн газрын гишүүн, Батлан хамгаалахын сайд Г.Сайханбаяр Бүгд Найрамдах Социалист Вьетнам Улсын Батлан хамгаалахын сайд генерал Фам Ван Сиангийн урилгаар 2022 оны арванхоёрдугаар дугаар сарын 05-09-ний өдрүүдэд тус улсад албан ёсны айлчлал хийлээ.
Айлчлалын хүрээнд БНСВУ-ын Ерөнхий сайд Фам Минь Чиньд бараалхаж, Батлан хамгаалахын сайд, генерал Фам Ван Сиангтай албан ёсны уулзалт хийж, хоёр орны харилцаа, хамтын ажиллагааны талаар санал солилцов.
БНСВУ-ын Ерөнхий сайдтай хийсэн уулзалтаар хоёр орны улс төр, эдийн засаг, нийгмийн харилцаа, хамтын ажиллагааны талаар дэлгэрэнгүй ярилцаж, цаашдын харилцааны цар хүрээг өргөжүүлэн бэхжүүлэхийг эрмэлзэж буйгаа талууд онцолжээ. БНСВУ-ын Ерөнхий сайд Фам Минь Чинь хэлсэн үгэндээ, Вьетнамын Засгийн газрын зүгээс Монгол Улстай хөгжүүлэх батлан хамгаалах салбарын харилцаа, хамтын ажиллагааг тууштай дэмжиж ажиллана гэдгийг онцлон тэмдэглээд, батлан хамгаалахын салбарын хамтын ажиллагаа бол хоёр улсын дипломат харилцааны тулгуур болох ёстой хэмээн байр сууриа илэрхийлэв.
Батлан хамгаалахын сайд Г.Сайханбаяр Ерөнхий сайд Фам Минь Чиньд Монгол Улсын Ерөнхий сайдын мэндийг уламжлан, бид бүс нутагтаа геостратегийн чухал байрлалд, ашиг сонирхол төстэй, хүн ард маань олон жилийн найрсаг харилцаатай, ирэх 2024 онд хоёр орны хооронд дипломат харилцаа тогтоосны 70 жилийн ойгоо тэмдэглэнэ, БНСВУ-тай хөгжүүлж буй харилцаа нь Монгол Улсын гадаад харилцааны бодлогод туйлын чухал чиглэл тул урьдын уламжлалт, найрсаг, нөхөрсөг харилцаагаа өргөжүүлэхийг бид эрмэлздэг, түүний дотор батлан хамгаалах салбарын харилцааг шинэ шатанд ахиулж, хамтын ажиллагаагаа өргөжүүлэх сонирхолтой байгаагаа илэрхийлэв.
БНСВУ-ын Батлан хамгаалахын сайд, генерал Фам Ван Сиангтай уулзах үеэр тэрбээр түүний урилгыг хүлээн авч Вьетнам оронд албан ёсны айлчлал хийж буйд талархлаа илэрхийлж, цаашид талууд бүс нутгийн аюулгүй байдлын асуудлаар санал солилцох, харилцан айлчлал зохион байгуулах, цэргийн сургалтыг нэмэгдүүлэх, зэвсэглэл, техникийн шинэчлэл, батлан хамгаалах аж үйлдвэрүүдийн хамтын ажиллагааг хөгжүүлэх, цэргийн эмнэлэг, спорт, урлагийн байгууллагуудын хамтын ажиллагааг хөгжүүлэх зэргээр хамтран ажиллах боломжтой талаар мэдэгдэв.
Батлан хамгаалахын сайд Г.Сайханбаяр хариу хэлсэн үгэндээ эрхэм сайдтай 2022 онд хоёр дахиа нүүр тулан уулзаж байгаадаа баяртай байна, бид газар хол ч сэтгэл ойрхон эртний түншүүд, өнөөгийн олон улсын харилцааны талбарт ч бие биенээ байнга дэмжиж ирсэн, хоёр орны батлан хамгаалах салбарын харилцаа сэргэж, өргөжиж буйд баяртай байдаг, Вьетнам орон анх удаагаа батлан хамгаалахын аж үйлдвэрийн үзэсгэлэн өөрийн орондоо амжилттай зохион байгуулж байгаад баяр хүргэе гээд хоёр орны цэргийн алба хаагчид Өмнөд Суданд хамтран НҮБ-ын энхийг сахиулах ажиллагаанд үүрэг гүйцэтгэж байгаа, цаашид туршлага, сургамжаа хуваалцах, шинээр цэргийн эмнэлэг, спорт, урлагийн байгууллагуудын хамтын ажиллагааг эхлүүлэх, найрамдлын айлчлал солилцох, батлан хамгаалах аж үйлдвэрийг хөгжүүлэх чиглэлээр хамтран ажиллах боломжтойг нотлов.
Айлчлалын үеэр БНСВУ-ын Батлан хамгаалах яамнаас зохион байгуулсан Батлан хамгаалахын аж үйлдвэрийн үзэсгэлэнгийн үйл ажиллагаатай танилцав. Уг үзэсгэлэн нь Вьетнамын батлан хамгаалах салбарын гадаад харилцааг тэлэх, дотооддоо үйлдвэрлэсэн технологи, үйлдвэрлэлийн хүчин чадлыг олон улсад танилцуулах зорилготой зохион байгуулагдлаа. Мөн дэлхийн 30 гаруй орны, 170 гаруй батлан хамгаалах чиглэлээр үйл ажиллагаа явуулдаг үйлдвэрлэгчид оролцож, 500 гаруй зочин төлөөлөгч үзэж сонирхжээ.
Үзэсгэлэнг БНСВУ-ын Ерөнхий сайд Фан Минь Чинь нээж хэлсэн үгэндээ, “Аюулгүй байдлын орчин нөхцөл хурдацтай өөрчлөгдөж буй өнөө үед Вьетнам Улс бусдаас хараат бус байж, зэвсэглэл техникээ сайжруулж, олон улсад өрсөлдөхүйц чанартайгаар үйлдвэрлэж эхэллээ. Вьетнам Улс даавуу үйлдвэрлэлээс орчин үеийн өндөр технологи бүхий зэвсэглэл, техник үйлдвэрлэгч орон болон хөгжиж, өөрчлөгдөж байна” хэмээн онцлон тэмдэглэв.
Мөн айлчлалын хүрээнд Батлан хамгаалахын сайд тус улсын удирдагч Хо Ши Мин-ий бунханд цэцэг өргөн хүндэтгэл үзүүлж, Цэргийн түүхийн музей, Ханой хотын түүхийн дурсгалт газруудаар зочлов. Мөн БНСВУ-д суралцаж буй Монгол Улсын Зэвсэгт хүчний цэргийн алба хаагчидтай уулзаж, эх орныхоо нэрийг өндөрт өргөн, амжилттай суралцаж буйд баяр хүргэж цаашдын сурлага хөдөлмөрт нь амжилт хүсэв.
Батлан хамгаалахын сайд Г.Сайханбаярын БНСВУ-д хийсэн албан ёсны айлчлал хоёр орны улс төр, нийгэм, эдийн засаг, батлан хамгаалах салбарын харилцаа, хамтын ажиллагааг бэхжүүлэх, ялангуяа цэргийн харилцаа, хамтын ажиллагааг өргөжүүлэхэд чухал айлчлал боллоо.
Энэ мэдээнд өгөх таны сэтгэгдэл?
3
ТэнэглэлТэнэглэл
2
ХахаХаха
1
ЗөвЗөв
1
ХөөрхөнХөөрхөн
1
ГайхмаарГайхмаар
0
ХарамсалтайХарамсалтай
0
БурууБуруу
Баярлалаа!

Холбоотой мэдээ

NewsMN Гар утасны хувилбар Татах
NEWS.mn

Мэдээллийн эх сурвалж