Хүнс хөдөө аж ахуй, хөнгөн үйлдвэрийн яамны мэдээгээр 13 аймагт өвөлжилт хүндрээд буй. Тэгвэл Шадар сайд С.Амарсайхан өвөлжилт хүндрээд буй Төв аймагт энэ сарын 23-нд ажиллаад зарим сумдад шаардлагатай техник, тоног төхөөрөмж, шатахуун олгохоор шийдвэрлэжээ.

Тухайлбал, Төв аймгийн Эрдэнэ сумд 20-80 см цасан бүрхүүл тогтож, мал бэлчээрлэхэд хүндрэл үүссэн байна. Малчдын яриагаар өнгөрсөн 30 жилд байгаагүй цастай жил болж буй аж.

Эрдэнэ сумын хувьд нийт нутаг цасан бүрхүүлтэй, 1, 4, 5 дугаар багуудын нутаг дэвсгэрт малын бэлчээр муу, гуу жалгандаа 40-80 см , бусад газартаа 20-30 см цасан бүрхүүл тогтож, мал бэлчээрлэхэд хүндрэл үүсээд байгаа юм.

Малчид байгалийн хадлан 8256.5 тн өвс, ногоон тэжээл 1326 тн, үйлдвэрийн тэжээл 205 тн, гар тэжээл 1250 тн бэлтгэсэн. Сумын аюулгүйн нөөцөд өвс 70 тн, ногоон тэжээл 30 тн, үйлдвэрийн тэжээл 52,5 тн бэлтгэсэн байна. Аюулгүйн нөөцөд бэлтгэсэн өвс тэжээлээс малчидад 1000 боодол өвс, 30 тн хивэг тэжээл, 500 боодол ногоон тэжээлийг хямдралтай үнээр олгосон байна.

Шадар сайд Төв аймгийн өвөлжилт хүндэрсэн сумдуудад ажиллах үеэр өвөлжилтийн нөхцөл байдал, аймаг, сумын онцгой комиссын үйл ажиллагаа болон малчин өрхүүдэд тулгамдаж буй асуудлыг сонсож, шаардлагатай хэд хэдэн арга хэмжээг авахаар болжээ.

Тухайлбал, өвөлжилт хүндэрсэн зарим сумын онцгой комиссын ажиллах нөхцөл хүнд байгаа тул үйл ажиллагаанд нь шаардлагатай дэмжлэг, туслалцаа үзүүлж, сумдын аюулгүйн нөөцөд олгох өвс, тэжээлийн нийлүүлэлтийг нэмэгдүүлэх, өвөлжөө, хаваржаа руу зорчих гол замуудыг гаргахад сумын онцгой комисст шатахууны дэмжлэг үзүүлэх, УОК-с эхний ээлжид Төв аймгийн Эрдэнэ, Баяндэлгэр сумдын ЭМТ-д туулах чадвар сайтай, бүрэн тоноглосон автомашин олгохоор болжээ.

Мөн мал ангилах, мах бэлтгэлийн ажлыг шуурхай зохион байгуулан, махны нийлүүлэлтийг эрчимжүүлэх замаар малчдын орлогыг нэмэгдүүлж, хэрэгцээт өвс, тэжээлийг хөнгөлөлттэй үнээр худалдаалах, Малын шилбэ муудахаас урьдчилан сэргийлэхэд анхаарч, малын био бэлдмэлийн хангалтыг нэмэгдүүлэх арга хэмжээг тус тус хэрэгжүүлэхээр шийдвэрлэжээ.

Г.ХОРОЛ