Ираны эрх баригчид эсэргүүцлийн жагсаалыг хүчээр дарсны дараа Германы засгийн газраас тус улстай хийх бизнесийн үйл ажиллагаанд  үзүүлэх баталгааг албан ёсоор зогсоож байгаагаа Баасан гарагт мэдэгдэв.

Эдийн засгийн яам "Иран дахь маш ноцтой нөхцөл байдлын улмаас" эрчим хүчний асуудлаарх яриа хэлэлцээ зэрэг бусад "эдийн засгийн форматыг" зогсоосон гэж мэдэгдэв.

Экспортын зээлийн баталгаа нь Германы компаниудыг экспортын төлбөрөө төлөөгүй үед хохирохоос хамгаалдаг. Хөрөнгө оруулалтын баталгааг Германы компаниудын шууд хөрөнгө оруулалтыг тухайн улс оронд нь улс төрийн эрсдэлээс хамгаалах зорилгоор олгодог. Ираны цөмийн гэрээг байгуулснаас хойших хугацаанд цөөн хэдэн төсөлд баталгаа гаргаж, сунгасан ч 2019 оноос хойш шинээр баталгаа гараагүй байна.

Германы засгийн газар одоо баталгааг "бүрэн түдгэлзүүлэх" шийдвэр гаргасан бөгөөд хүмүүнлэгийн шалтгаантай гэв.

Герман-Ираны худалдаа 2021 онд 1.76 тэрбум евро байсан бол энэ оны эхний есөн сард 1.49 тэрбум евро болсон гэж тус яам мэдэгдэв.

Ираны эмэгтэйчүүдийн хувцаслалтын хатуу дүрмийг зөрчсөн хэргээр ёс суртахууны цагдаад саатуулагдсан 22 настай Махса Амини нас барсны дараа өнгөрсөн есдүгээр сард орон даяар эсэргүүцлийн жагсаал болсон юм.
Жагсаал эхэлснээс хойш жагсагчидтай хэрцгий харьцаж, Украин дахь дайнд зориулж Орос руу олон зуун нисгэгчгүй онгоц илгээх шийдвэр гаргасан тул Ираны эсрэг АНУ болон Европын холбоо нэмэлт хориг арга хэмжээ авчээ.

Герман улс өнгөрсөн сард НҮБ-ын Хүний эрхийн зөвлөлийн хурлыг хуралдуулж, хэлмэгдүүлэлтийг буруушааж, бие даасан баримт судлах комисс байгуулахаар санал өгсөн.

ЭХ СУРВАЛЖ: ASSOCIATED PRESS