Өнөөдөр Монголын залуучуудын өдөр. Энэ өдрийг тохиолдуулан НҮБ-ын Залуучуудын зөвлөлдөх хороо болон Гадаад харилцааны яамтай хамтран олон улсын залуучуудын жилийн нээлтийн ёслолыг Гадаад харилцааны яамны хурлын танхимд зохион байгуулав. Ёслолыг нээж Гадаад харилцааны сайд Г.Занданшатар залуучуудад хандаж үг хэлж, "Монголын залуучуудын өдөр тохиож буй энэ өдөр Монголчууд нийтээр баярлаж бахархах сайхан цаг мөчийг залуучуудтай хуваалцаж байгаадаа баяртай байна" гэсэн юм.

Өнгөрсөн 2009 оны аравдугаар сарын 18-нд НҮБ-ын ерөнхий Ассамблейгаас олон Улсын залуучуудын жилийг зохион байгуулах тогтоолыг баталж, энэ оны наймдугаар сарын 12-нд үйл ажиллагааг нь эхэлснийг зарласан. Залуучуудын жилийн нээлтийн ёслолд НҮБ-ын Монгол дахь суурин зохицуулагч хатагтай Сезин Синаноглу, Улсын Их Хурлын гишүүн С.Бямбацогт, НҮБ-ын Залуучуудын зөвлөх хорооны зохицуулагч Х.Батсайхан нар болон бусад төлөөлөгчид оролцож байна. Уулзалтын хүрээнд энэ жилийн хувьд Монголын залуучуудын байгууллагууд хэрхэн хамтран ажиллах тухай ярилцав. 

Б.Алтансүх