Аргентины нийслэл Буэнос Айрес хотноо дөрвөн сая хүнийг хамарсан баярын жагсаал үргэлжилж, унтаж, амрах хүн алга. Хөлбөмбөгийн ДАШТ-д түрүүлсэн шигшээ баг нь автобусаар явах замгүй болж, эцэстээ нисдэг тэрэг хөлөглөсөн гэнэ. Баярлаж хөөрсөн иргэд хотын гудамжинд гарч жагсан автобус явах замыг нь хаажээ.

Катараас эх орондоо эргэн ирсэн тамирчид нь бэлтгэлийн баазаасаа нийслэлийнхээ төв хүртэл 20 милл газар автобусаар аялж, Обелискийн хөшөөнөөс цааш газраар явах боломжгүй болсон аж.

Аргентины засгийн газраас өчигдөр/2022.12.20/ бүх нийтийн амралт зарлажээ.

Мөн АНУ-ын ерөнхийлөгч Жо Байден, ОХУ-ын ерөнхийлөгч Владимир Путин, Францын ерөнхийлөгч Эммануэль Макрон зэрэг улс орнуудын төрийн тэргүүнүүд Аргентины ерөнхийлөгч Алберто Фернандецтай утсаар холбогдон баяр хүргэжээ.

Ерөнхийлөгчийн тамгын газрын хэвлэлийн төлөөлөгч Габриела Черрутигийн мэдээлснээр “Баярлаж хөөрсөн иргэдийн бөөгнөрөлөөс шалтгаалан автобусаар баярын жагсаалаа үргэлжлүүлэх боломжгүй боллоо. Өнөөдөр Аргентин улсын түүхэн дэх хамгийн онцгой баяруудын нэг тохиож байна. Өнөөдөр зөвхөн баяр хөөр, сэтгэл хөдөлгөм баярын жагсаал, бие биенээ гэсэн сэтгэл, талархал л байна” гэжээ.

Буэнос Айрес хот бүхэлдээ цэнхэр, цагаан шигшээ багийнхаа өмсгөлөөр хучигдаж, Марадона, Месси нарын зураг барилга, байшин бүрийн хана, айл бүрийн тагт дээр байх аж.

Аргентинчууд 1986 онд Марадонагоос хойш дэлхийн аваргад түрүүлж үзээгүй байсан юм.

Үүнээс гадна Мессигийн дэлхийн аваргын алтан цомтой даруулсан зураг инстаграмын түүхэнд 55 сая лайктай анхны зургаар тодорчээ.