Хоёр хүүхэд гэмтээж, долоон машин мөргөсөн жолооч Ч.Маралмаад хилийн хориг тавьсан талаар өмнө нь мэдээлж байв. Нийгмийг бухимдуулсан энэ хэргийг Баянзүрх дүүргийн Эрүүгийн хэргийн анхан шатны шүүхэд шилжүүлсэн байна.

"ГООЖИНГИЙН ӨНДӨР"-ИЙГ НИЙСЛЭЛИЙН МЭДЭЛД АВАХ ШҮҮХ ХУРАЛД ЯЛЖЭЭ

Монгол Улсын анхны Ерөнхий сайд Т.Намнансүрэнгийн амьдарч байсан Гоожингийн өндөрийг нийслэлийн мэдэлд буцаан авах, сэргээн засварлах, хамгаалах маргаанд Захиргааны хэргийн давж заалдах шатны шүүх дээр ялжээ. Нэг жилийн өмнө Хотын даргын гаргасан шийдвэр шүүх дээр маргаан үүссэний улмаас хэрэгжиж чадаагүй байсан.

News.mn агентлаг 2019 оноос “Аврал эрсэн Гоожингийн өндөр”  сурвалжлагаараа түүхэн дурсгалт барилгын асуудлыг хөндсөн. Ад шоо үзэгдсэн энэ "балгас"-ыг нэн даруй авран хамгаалах шаардлагатайг судлаачид хэлж сануулсаар л байгаа. Хотын дарга Д.Сумъяабазар /2021.12.29/ түүхэн барилгыг хамгаалалтад авах тухай захирамж гаргаж буйгаа зарлаж шоудсанаас хойш долоон сар өнгөрчээ. Мөн хувийн эзэмшилд очсон газар эзэмших эрхийг нь цуцалж, шүүхээр түүхэн барилгын үнэлгээг эцэслэн тогтоохоор болсон.

Хамгийн сүүлд 2013 оны нэгдүгээр сард иргэн н.Үеэлэнгээс 521 мкв, хувийн орон сууцны зориулалттай “Гоожингийн өндөр”-ийг Б.Мөнх-Эрдэнэ гэх иргэн худалдан авч, эзэмших эрхийн гэрчилгээгээ гаргуулжээ.

АТГ-ААС Х.БАТТУЛГЫГ БАЙЦААЛТАД ДУУДСАН УУ?

АТГ-аас өнгөрөгч Мягмар гаригт нүүрсний хэрэгт шууд болон шууд бусаар холбоотой 17 улстөрчийг нэрлэсний нэг нь Монгол Улсын Ерөнхийлөгч асан Х.Баттулга байсан. Түүнийг "Эрдэнэс Тавантолгой" компанийн гүйцэтгэх захирлаар ажиллаж байсан Б.Ганхуягийн мэдүүлэгт үндэслэн ийнхүү сэжигтнээр нэрлэжээ.  Тэрбээр Эрүүгийн хуулийн 22-т заасны дагуу хэргээ хялбаршуулах журмаар хянан шийдвэрүүлэхээр хамсаатнуудаа илчлэх болсон гэх мэдээлэл байна.  Тиймээс АТГ-аас Ерөнхийлөгч асан Х.Баттулгыг дуудаж байцаалт авахаар болсон аж.  Экс Ерөнхийлөгчийг Гашуунсухайт, Зүүнбаянгийн төмөр замын бүтээн байгуулалтын гэрээг ҮАБЗ-ийн дарга байхдаа төрийн нууцад хамруулж, мөнгө угаасан байж болзошгүй. Мөн Хөгжлийн банкны өөрийн хамаарал бүхий хүмүүсээрээ дамжуулан зээл авч шамшигдуулсан гэх хэд хэдэн хэрэгт холбогдуулан шалгаж байгаа бололтой.

МАЛАЙЗАД НАС БАРСАН Ш.АЛТАНТУЯАГИЙН ХЭРГИЙГ ЭЦЭСЛЭВ

Монгол Улсын иргэн Шаарийбуугийн Алтантуяа 2006 онд Малайзад бусдын гарт амь насаа алдсан хэрэг гарч байв. Энэ хэрэг эцэслэн шийдэгдэлгүй удсаны эцэст Малайзын шүүхээс өнөөдөр /2022.12.16/ хариуцлага хүлээх хүмүүсийн нэрийг зарлав. Ш.Алтантуяагийн үхэлд улс төр судлаач Абдул Разак Багинда, ахлах байцаагч Азилах Хадри, бага түрүүч Сирул Азхар Умар нарын гурван хүнийг, мөн засгийн газрыг буруутай гэж үзлээ.

Ш.Алтантуяагийн гэр бүлийнхэн 100 сая ринггитийг нэхэмжилсэн. Гэвч Давж заалдах шатны шүүхийн шүүгч энэ мөнгөн дүнг хэт их байна гэж мэдэгдээд таван сая ринггит төлөх шийдвэр гаргажээ.

Энэ нь 1.13 сая ам.доллар буюу монгол мөнгөөр 3.76 тэрбум орчим төгрөг болох юм. Таван сая ринггитийг дээрх дөрвөн хариуцагч хамтран төлж барагдуулах юм байна. Нэхэмжлэл гаргасан өдрөөс эхлэн хохирлыг бүрэн барагдуулах хүртэл таван хувийн алданги тооцох аж. Алтантуяагийн аав С.Шаарийбуу, ээж С.Алтанцэцэг, хоёр хүү болох Б.Мөнгөншагай, Б.Мөнхтулга нар сэтгэл санааны хохирлоо нөхөн төлүүлэх нэхэмжлэлийг 2007 оны зургадугаар сарын 4-нд Малайзын шүүхэд гаргаж байв.

Дэлгэрэнгүйг энд дарж уншина уу.