Иргэдийн эсэргүүцлийн жагсаал Сүхбаатарын талбайд хоёр өдөр үргэлжилсэн. Эсэргүүцлийн жагсаалын хоёр дахь өдөр буюу өчигдөр /2022.12.05/ цагдаа, дотоодын цэргийн байгууллагын 13 алба хаагч биедээ гэмтэл авч, үүнээс 12 алба хаагч эмнэлгийн тусламж үйлчилгээ авч, нэг алба хаагч эмнэлэгт хэвтэн эмчлүүлж байна.

Цагдаагийн байгууллагаас жагсаал цуглааны үед иргэдийн үзэл бодлоо илэрхийлэх, эвлэлдэн нэгдэх эрх чөлөөнд хүндэтгэлтэй хандаж, эмх замбараагүй байдал үүсэхээс урьдчилан сэргийлж хуулиар хүлээсэн үүргээ хэрэгжүүлж ажилласан. Жагсаалд оролцогч зарим иргэдийн зүгээс бусдыг эмх замбараагүй байдалд уриалсан байна. Төрийн ордон руу дайрах үед иргэдийн нягтаршил, хөдөлгөөнөөс шалтгаалан 10 иргэн бэртэж гэмтэн, амьсгал давчдаж, ухаан алдах зэргээр эмнэлгийн тусламж хэрэгтэй болсон байна.

Мөн Цагдаагийн байгууллагаас жагсаал, цуглааны үед үйлдэгдсэн гэмт хэрэг, зөрчлийн шинжтэй 19 үйлдэлд холбогдох шалгалтын ажиллагаа явуулж байна. Тухайлбал, Засгийн газрын ордны хаалганы шил хагалсан, хашааг нураасан, гацуур модыг галдан шатаасан, тээврийн хэрэгсэл дээр хашаа нурж автомашинд эвдрэл үүссэн, "Туушин" зочид буудлын орчимд ачигч тээврийн хэрэгсэлд халдан эвдэж, гэмтээн салхины шил, гэрэл, хаалга зэргийг эвдэлсэн, төв талбайн урд байрлах цагдаагийн постны байрны цонхыг хагалсан зэрэг гэмт хэрэг, зөрчлийн шинжтэй үйлдэлд шалган шийдвэрлэх ажиллагаа явуулж байна.