Сэлбэ төслийг унагасан нь зөв!

Хуучирсан мэдээ: 2022.12.01-нд нийтлэгдсэн

Сэлбэ төслийг унагасан нь зөв!

Сэлбэ төслийг унагасан нь зөв!

Нийслэлийн Иргэдийн Төлөөлөгчдийн хурал дахь МАН-ын бүлэгт баяр хүргэе.  Цаг үеийг нь олж, Сэлбэ төслийг унагалаа.

Монгол Улсын хүн амын 50 хувь нь буюу 1.7 сая орчим иргэн амьдарч буй нийслэлд Сэлбэ голыг тохижуулахаас илүү нийтийн тээврийн парк шинэчлэлтээ хийх, газар хөдлөлтөд тэсвэргүй болсон барилгуудаа буулгаж, шинээр барих, агаар, хөрсний бохирдол “үйлдвэрлэдэг” гэр хорооллоо барилгажуулах зэрэг хоолойд тулсан их ажил хүлээж буй. Гэвч чухал төслүүддээ хөрөнгө хуваарилдаггүй хэрнээ шаардлагагүй төслүүдийг санхүүжүүлэх гэж зүтгэдэг , олонхиороо түрж дэмждэг нь төсвийн үргүй зардлыг өсгөж ирсэн буруу жишиг тогтсон байсан ч энэ удаад татгалзаж чадлаа.  Зөв жишиг. 2023 оны төсвөөс Сэлбэ голыг тохижуулах төслийг хассанаар 3.1 тэрбум төгрөгийн хэмнэлт гарч байна.

Одоо НИТХ 2023 оны төсвийн төслөөс энэ мэтчлэн, шаардлагагүй хөрөнгө оруулалтыг хасч,  том төслүүддээ санхүүжилтийг нь шилжүүлж чадвал хоёр жил гэдэг бага хугацаа ч чамгүй олон зүйлийг амжуулж чадна.

Жавар тачигнаж буй энэ өдрүүдэд нийтийн тээврийн салбар амь тавих шахам байж, зорчигчдоо тээвэрлэж байгааг харж болно.  Насжилт нь хэдийнэ дууссан автобуснуудыг нийтийн тээвэрт гаргахгүй байя гэвч орлуулж гаргах автобус алга.

Гэхдээ Хот хариуцсан сайд Ж.Сүхбаатарын мэдээллээр  нийслэлийн төсвийн хөрөнгө оруулалтаар БНХАУ-аас 2023 оны нэгдүгээр сарын 5-нд 100 автобус, хоёрдугаар сарын эхээр 124 автобус оруулж ирэхээр болжээ. Парк шинэчлэлтээ 200 гаруй автобусаар сэлбээд авна гэдэг нь нийслэлчүүд дулаан автобусаар зорчих боломж бүрдэж байна гэсэн үг. Гол нь хүйтний улиралд тохирсон автобус байх ёстой. Өмнө нь БНСУ-аас автобус оруулж ирж, парк шинэчлэлт хийтэл ес эхлэнгүүт цонх нь цантан, хаалга нь хаагдахгүйгээс жолооч нар автобусаа зогсоож байгаад урд цонхоо арчих, хаалгатайгаа ноцолдож арайчүү хаах зэргээр аргалж ирсэн. Нэгэнтээ татвар төлөгчдийн мөнгөөр нийтийн тээврээ шинэчилж байгаа болохоор Монголын нөхцөлд тохирсон автобус оруулж ирэх нь чухал юм.

Нийслэлийн Иргэдийн Төлөөлөгчдийн хуралдаанаас мөн 2023 оны төсөвтэй холбоотойгоор  Бодлогын судалгаа шинжилгээний газрын төсвийг 1.9 тэрбум төгрөгөөр бууруулахаар болсон аж.

Энэ мэтчлэн нийслэлийн төсвийн усыг шахаж чадвал тэрбум, тэрбумаар хэмнэлт гарч, нэн тэргүүний тулгамдсан асуудлаа шийдвэрлэх санхүүжилтийн эх үүсвэр гарч ирэх бололцоо бүрдэж байна. Тухайлбал, жил бүр нийслэлийн төсвөөр цэцэрлэг барьж, ашиглалтад оруулдаг ч хэрэгцээг бүрэн хангаж чадахгүй байгаа. Санхүүжилтгүйгээс баригдаж чаддаггүй цэцэрлэгүүд ч бий. Түүн рүү хөрөнгө оруулалтыг шилжүүлбэл хот тулгамдаж байгаа асуудлаа нэгээр ч болов шийднэ гэсэн үг.

Г.ХОРОЛ

Энэ мэдээнд өгөх таны сэтгэгдэл?
21
ЗөвЗөв
3
ХахаХаха
3
ТэнэглэлТэнэглэл
0
ХөөрхөнХөөрхөн
0
ГайхмаарГайхмаар
0
ХарамсалтайХарамсалтай
0
БурууБуруу
Баярлалаа!

Холбоотой мэдээ

NewsMN Гар утасны хувилбар Татах
NEWS.mn

Мэдээллийн эх сурвалж