“Катар-2022” ДАШТ-ий хоёрдугаар тойргийн эхний тоглолтууд боллоо.

УЭЛЬС 0 – 2 ИРАН

Иран эцсийн мөчид гайхалтай ялалт байгууллаа. Иранаас тоглолтын төгсгөлд шүүгчийн мэдлийн 98 болон 101 дэх минутуудад Рузбех Чесми, Рамин Резаейан нар гоолдов. Тоглолтын эргэлтийн цэг 86 дахь минутад тохиосон. Тодруулбал, Уэльсийн шигшээ багийн хаалгач Хеннесси бөмбөг зайлуулах гэж байгаад Ираны довтлогч Мехди Таремиг мөргөж, унагаажээ. Энэхүү үйлдлийн төлөө Хеннесси улаан хуудас хүртэж, Уэльс талбай дээр 10 хүнтэй үлдэв.

Тус тоглолтын шилдгээр Рузбех Чесми тодорчээ.

КАТАР 1 – 3 СЕНЕГАЛ

ДАШТ-ийг зохион байгуулагч Катар энэ удаагийн дэлхийн аваргыг орхих хамгийн эхний багаар тодорлоо. Хэдий ганц ч ялалт байгуулаагүй ч тэд дэлхийн аваргын түүхэн дэх анхны гоолоо оруулав. Тус түүхэн гоолын эзнээр Мунтари тодорсон. Харин Сенегалаас нийт гурван гоол оруулсан бөгөөд Диа, Дейдху, Дьенг нар гоолджээ.

Тоглолтын дараа Сенегалын хамгаалагч Юссуф Сабали “Би ялж чадлаа. Нээлтийн тоглолтдоо хожигдож, таагүй эхлэл тавьсны дараа ялалт байгуулсан нь чухал байв. Бидэнд дахиад боломж гарч ирлээ. Хэсгээс гарахын тулд дахиад ганц шийдвэрлэх тоглолт хийнэ. Тэр тоглолтод бид бүхнээ зориулна” гэжээ.

Тус тоглолтын шилдгээр Булаи Диа тодорчээ.

НИДЕРЛАНД 1 – 1 ЭКУАДОР

Нидерландаас Годи Гакпо тоглолт эхлээд удаагүй байхад гоол оруулж, багтаа тэргүүллийг авчирсан. Гэвч тэргүүллээ баталгаажуулж чадсангүй. Хоёрдугаар хагас эхлээд удаагүй байхад Экуадороос өнөөх л Эннер Валенсиа гоолдож, тооны харьцааг тэнцүүлэв. Улмаар үлдсэн хугацаанд гоол орсонгүй, хоёр баг эвийн гэрээ байгууллаа.

Тоглолтын дараа Нидерландын хамгаалагч Жюррьен Тимбер “Бид бөмбөгтэй сайн харьцаж чадсангүй. Энэ л өнөөдрийн асуудал байлаа. Үүн дээрээ сайжирч, анхаарах болно. Экуадор үнэхээр түрэмгий, биднээс илүү түрэмгий байлаа. Сайн зүйл нь бид оноо авч чадлаа. Эцэст нь үр дүнтэй, гурван оноо авч чадаагүй ч ялагдсангүй. Сайн тоглоогүй гэхэд муугүй үр дүн шүү. Ганц оноо бол өнөөдөртөө хангалттай. Одоо алдаан дээрээ ажиллаж, дараагийн тоглолтдоо бэлдэх хэрэгтэй. Бид Валенсиаг сайн довтлогч гэдгийг нь мэдэж байсан. Түүнийг хамгаалах гэж ч их үзлээ. Гэхдээ тэр өнөөдөр түрэмгий, шийдэмгий байлаа” гэжээ.

АНГЛИ 0 – 0 АНУ

Англи, Америкийн тоглолтоос их зүйл хүлээж байсан ч тун уйтгартай тоглолт болж өнгөрөв. Ялангуяа Английн шигшээ багийг үзүүштэй тоглолт үзүүлэх болов уу гэж фанатууд нь хүлээж байсан ч тэгсэнгүй. Харин эсрэгээрээ Америкийн залуус олон аюултай довтолгоо өрнүүлж, Английн хамгаалалтыг сандаргаж байлаа.