Өмнөд Солонгос улсын засгийн газар зургадугаар сарын 1-нээс Чежү, Яньян нисэх онгоцны буудлуудаар гадаадын жуулчдыг визгүй нэвтрүүлэх шийдвэр гаргасан. Тус улсад нэвтэрч буй жуулчид Чежү арал дээр 30 хоног визгүй байх боломжтой. Түүнчлэн зорчихоосоо өмнө аялах зөвшөөрлөө цахимаар авсан тохиолдолд Чежү арлаас гадуур зорчих боломжтой аж. Мөн Яньян олон улсын нисэх онгоцны буудлаар нэвтэрч буй Вьетнам, Филиппин, Индонез, Монгол зэрэг орны тав ба түүнээс дээш тооны жуулчин 15 хоног визгүй зорчих боломжтой болсон.

Тус шийдвэр энэ сарын 1-нээс 2023 оны тавдугаар сарын 31-ний өдрийг хүртэл үйлчлэх юм.

Үүний дагуу “МИАТ” ТӨХК Өмнөд Солонгосын Канвон мужийн Яньян олон улсын нисэх буудал руу захиалгат нислэг үйлдэж эхэлжээ. Тодруулбал, үндэсний агаарын тээвэрлэгч “МИАТ” ТӨХК-ийн БНСУ-ын Канвон мужийн Яньян чиглэлд үйлдэх анхны захиалгат нислэг аравдугаар сарын 25-ны 11:53 цагт Хөшигийн хөндий дэх "Чингис Хаан" нисэх буудлаас хөөрсөн байна.

БНСУ-ын Засгийн газар багаар аялах Монгол иргэдийг Яньянаар дамжуулан визгүй нэвтрүүлэх журам баталсны дагуу “МИАТ” энэ долоо хоногоос 2023 оны тавдугаар сарын 31-нийг хүртэл Бямба гариг бүр Яньян олон улсын нисэх буудлын чиглэлд нислэг үйлдэхээр төлөвлөж байна.

Дээрх шийдвэрт Монгол Улсын тав буюу түүнээс дээш хүний бүрэлдэхүүнтэй бүлэг жуулчид хамаарагдах бөгөөд дараах шаардлага тавигдах аж. Тодруулбал,

• Аялал жуулчлалын агентлагаар дамжуулан аяллын хөтөлбөр төлөвлөсөн байх,
• Зөвхөн Яньян олон улсын нисэх онгоцны буудалд нэг авиа компанийн нислэгээр бүгд ирж, бүрэн бүрэлдэхүүнээрээ эх орондоо буцах,
• Covid-19-ийн эсрэг вакцины бүрэн тунд хамрагдсан байх, халдвар хамгааллын дэглэмийг чанд мөрдөх,
• Орон нутгийн ажилтан дагалдах бол түүнтэй холбоотой үйлчилгээний хөлс төлөх, хилээр нэвтрэхэд хувийн болон шаардлагатай бусад мэдээллээ өгөхийг зөвшөөрсөн байх,
• Зөвхөн Ганвон муж болон Сөүл хотод аялах боломжтойг анхаарах зэрэг болно.

Энэхүү хөнгөлөлттэй нөхцлөөр Өмнөд Солонгост визгүй зорчсон хэдий ч тус улсын нутаг дэвсгэрийг орхин гараагүй, хугацаа хэтрүүлсэн иргэдийн тоо зорчсон нийт монгол иргэдийн таван хувиас давсан даруйд уг шийдвэр цуцлагдана гэж БНСУ дахь Монгол Улсын ЭСЯ-наас мэдээллээ.

БНСУ-руу визгүй нэвтрүүлэх журмын талаар дэлгэрэнгүй мэдээллийг эндээс авах боломжтой.