“Associated Press” агентлаг “ОХУ-ын пуужингууд Польшийн зүүн хэсэгт туссан” гэж бичсэн сэтгүүлч Жеймс Лапортаг энэ сарын 21-нд ажлаас нь халсан талаар өнгөрсөн Даваа гаригт “The Daily Beast” мэдээлэв.

Тус агентлаг дээрх мэдээг арваннэгдүгээр сарын 15-нд нийтэлсэн бөгөөд АНУ-ын тагнуулын нэрээ нууцалсан өндөр албан тушаалтны мэдээллээс иш татан, "Оросын пуужингууд НАТО-гийн гишүүн орон болох Польшийн хилийг давж, хоёр хүний ​​аминд хүрсэн” гэж бичжээ.

“Associated Press” агентлаг арваннэгдүгээр сарын 16-нд залруулга гаргаж, Оросын пуужингууд унасан гэж алдаа гаргасныг тэмдэглээд, мэдээгээ устгасан байна. Улмаар тус агентлаг уг пуужингуудыг "Украин харвасан байх магадлалтай"-г хүлээн зөвшөөрчээ.

Сэтгүүлч Жеймс Лапорта дээрх мэдээг Жон Лестертэй хамтран бичсэн байна. Гэвч өдгөө Жон Лестер “Associated Press” агентлагт ажилласан хэвээр байгаа аж.