Малайзын агаарын тээврийн "MH-17" нислэгийн дугаартай нисэх онгоцыг  пуужингаар онож сөнөөсөн хэрэгт Нидерландын шүүхээс хоёр орос, нэг украин хүнд ял оноолоо. Тодруулбал, Донецк Ардын улс гэгдэх Украины салан тусгаарласан бүс нутгийн цэргийн дарга Игорь Гиркин, "Бук" пуужинг хөөргөгчийг тээвэрлэх ажлыг хариуцсан Сергей Дубинский, пуужинг тээвэрлэсэн Леонид Харченко нарыг уг хэрэгт буруутайд тооцож, бүх насаар нь шоронд хорих ялаар шийтгэжээ.

Украины зүүн хэсэгт 2014 онд салан тусгаарлах бослого тэмцэл өрнөж байх үеэр иргэний агаарын тээврийн онгоц пуужинд оногдсоноос 298 хүн амь үрэгдсэн юм. Удаан үргэлжилсэн мөрдөн шалгах ажиллагааны үр дүнд уг пуужинг Оросын талаас нийлүүлж, Москваг дэмжигч зэвсэгт бүлэглэл харвасан болохыг олж тогтоосон аж. Уг хэрэгт гурван орос хүн холбогдсон боловч нэг нь цагааджээ. Шүүх хуралд өөрийн биеэр оролцсон Олег Пулатовыг уг хэрэгт буруугүй гэж үзэн цагаатгасан байна.

Хохирогчдын гэр бүлийн зүгээс өнгөрсөн найман жилийн турш ослын хариуцлагыг Орос улсад тохож, илүү хатуу арга хэмжээ авахыг шаардсаар ирсэн.