NATO: Нөхцөл байдлыг ажиглаж, холбоотнууд зөвлөлдөж байна

НЭМЭЛТ: 17:10 цаг
Умард Атлантын цэргийн эвслийн байгууллагын "NATO" байгууллагын сайд нар өнөөдөр шуурхай хуралдаж, Польшийн нутаг дэвсгэрт пуужин унаж, хоёр хүн амь үрэгдсэн асуудлыг хэлэлцлээ. Уулзалтын дараа "NATO"-гийн цэргийн албан тушаалтан хэвлэлд мэдээлэл өгөхдөө, "Пуужин Польшийн газар нутагт унах үед нь тухайн хэсэгт нисч явсан агаарын тээврийн онгоцны радарт илэрсэн бөгөөд тухайн мэдээллийг холбогдох албаныханд өгсөн" гэв. Гэхдээ тэрбээр пуужинг хэдэн цагийн үед, хаанаас харвасан талаарх дэлгэрэнгүй мэдээллийг өгөөгүй.

Харин "NATO"-гийн ерөнхий нарийн бичгийн дарга Йенс Столтенберг мэдэгдэлдээ, " Бид нөхцөл байдлыг ажиглаж, холбоотнууд нягт зөвлөлдөж байна. Бүх баримт нотлогдсон байх нь чухал” гэж хэлсэн байна.

НЭМЭЛТ: 10:30 цаг

“Их-20”-ийн удирдагчид Балид хуралдаж байх хооронд агаарын дайралтын дохио өчигдөр /2022.11.15/ Украин даяар сонсогдсон.

Оросын цэргийг Украинаас гаргах, нутаг дэвсгэрийн бүрэн бүтэн байдлыг сэргээх зэрэг 10 зүйл бүхий төлөвлөгөөг ерөнхийлөгч Зеленский гаргасны дараахан энэ үйл явдал болжээ.

Ерөнхийлөгч Зеленскийн ажлын албаны орлогч дарга Кирило Тимошенко хэлэхдээ ОХУ 90 гаруй пуужин харвасан гэжээ. Украины Агаарын довтолгооноос хамгаалах хүчин эндээс 70-ыг нь устгасан байна. Бусад пуужин нь нийслэл Киев, зүүн хойд хэсгийн Харьков, баруун хэсгийн Львов, өмнөд хэсгийн Одесса зэрэг хотод унажээ.

Киев хотод хоёр орон сууцны барилга нурж, нэг хүн амиа алдсан. Киев хотын тал хувь болон Харьковт эрчим хүчгүй болсон байна. Пуужингийн цохилтод өртсөний улмаас Нова Каховка далан дээр байрласан Оросын төрийн албан хаагчид хотыг орхижээ. Тэднийг аюулгүй бүс нутаг руу шилжүүлсэн байна. Нова Каховка нь Днепр мөрөн дээрх далан юм.

ЭХ СУРВАЛЖ: BBC, DW

"ОХУ-д үйлдвэрлэсэн" пуужин Украинтай хил залгаа Польш улсын Пржеводов тосгонд унаснаас өнгөрсөн шөнө буудай хатааж байсан хоёр тариачин амь үрэгджээ. Польшийн гадаад хэргийн яамнаас гаргасан мэдэгдэлд уг пуужинг хаанаас харвасныг тодорхой мэдээллээгүй бөгөөд дайтаж буй Москва, Киевийн аль аль нь "Орост үйлдвэрлэсэн" пуужинг ашиглаж буй. Улмаар Польшийн гадаад хэргийн яамнаас тус улсад суугаа ОХУ-ын элчин сайдыг дуудан уулзаж, Орост үйлдвэрлэсэн пуужин яагаад тус улсын нутаг дэвсгэрт унасан талаар тайлбар авчээ.

Энэ талаар АНУ-ын талаас албан ёсны мэдээлэл хийгээгүй байгаа ч тус улсын тагнуулын эх сурвалж "Associated Press" агентлагт хэлэхдээ, ОХУ-ын талаас харвасан пуужин Польшид унасан гэж мэдэгджээ.

Цагаан ордноос Польш болон Умард Атлантын цэргийн эвслийн байгууллагын "NATO" гишүүн орнуудтай холбогдон нөхцөл байдлыг тодруулахаар мэдээлэл цуглуулж байна гэсэн тайлбарыг хэвлэлийнхэнд өгчээ. Түүнчлэн "NATO"-гийн зүгээс нөхцөл байдлыг тодруулж, дараагийн шаардлагатай арга хэмжээг авахаар хэлэлцэж байна гэв. Польш улсын зүгээс "NATO"-гийн аюулгүй байдал, батлан хамгаалахын сайд нарыг хуралдуулахаар төлөвлөж буйгаа мэдэгдсэн.

Түүнчлэн Польшийн Ерөнхий сайд цэргийн анги нэгтгэлүүдийг өндөржүүлсэн бэлэн байдалд шилжүүлэх тушаал өгчээ.

"NATO"-гийн гэрээний Дөрөвдүгээр зүйлд гишүүн орнуудын бүс нутаг, улс төрийн тусгаар тогтнол, аюулгүй байдалд заналхийлэл учирвал ямар нэгэн хариу арга хэмжээ авахын тулд шуурхай хуралдахыг заасан байдаг. Улмаар Брюсселийн цагаар Лхагва гаригийн өглөө "NATO"-гийн ерөнхий нарийн бичгийн дарга Йенс Столтенберг тус эвслийн шуурхай хурлыг зарлан хуралдуулахаар болжээ. Улмаар тус эвслийн гишүүн орнууд ОХУ-ыг буруутгаж, Польшийн талд эв нэгдлээ илэрхийлсэн байна. Түүнчлэн "Их-20" бүлгийн чуулга уулзалтын өнөөдрийн хуралдаанаар энэхүү асуудлыг хэлэлцэх бололтой. "NATO" эвсэлд Хойд Америк, Европын 30 орон багтдаг. Тус эвсэл нь 1949 онд хүйтэн дайны эхэн үед Зөвлөлтийн болзошгүй аюул заналхийллээс барууныг хамгаалах зорилгоор үүсгэн байгуулагдсан.

Харин ОХУ-ын батлан хамгаалах яамнаас Украин-Польшийн хилийн бүсийг онилоогүй гэж мэдэгдээд, Польшийн хэвлэл мэдээллийн байгууллагуудыг санаатайгаар нөхцөл байдлыг дэвэргэхээ болихыг шаарджээ.

Пржеводов тосгон нь Украины хилээс 5 км хүрэхгүй зайтай оршдог. ОХУ-ын талаас өчигдөр орой Украины газар нутаг руу 100 орчим пуужингаар харваж, дайралт хийх үеэр энэхүү "осол" гарлаа. Түүнчлэн Молдав улс руу эрчим хүч нийлүүлдэг сүлжээ тасалдаж, Украины долоон сая өрх гэрэл цахилгаангүй болжээ. ОХУ-аас хийсэн агаарын довтолгоонд Украины эрчим хүчний 15 газар өртөж, Киевийн тал, Львовын 80 хувь болон өөр хэд хэдэн муж гэрэл цахилгаангүй болсон байна. Түүнчлэн цахилгаангүй болсноос ундны ус, халаалт, интернэт сүлжээ тасалджээ.