Нэгдсэн үндэсний байгууллагын Залуучуудын зөвлөх хороо, Монгол Улсын Гадаад харилцааны яамтай хамтран Олон улсын залуучуудын жилийн нээлтийн ёслолыг маргааш 14 цагаас Гадаад харилцааны яамны хурлын танхимд  зохион байгуулахаар боллоо.

Нээлтийн арга хэмжээнд Гадаад харилцааны сайд Г.Занданшатар, НҮБ-ын Монгол дахь Суурин төлөөлөгч хатагтай Сезин Синаноглу, УИХ-ын залуу гишүүдийн төлөөлөл болон Засгийн газар, залуучуудын байгууллагууд оролцоно. Энэ үеэр Олон улсын залуучуудын жилийг нээн ёслолын тууз хайчлах бөгөөд  НҮБ-ын Ерөнхий нарийн бичгийн даргын илгээлтийг  танилцуулж цаашид хийх ажлын талаар хэлэлцүүлэг өрнүүлэх юм.

Өнгөрөгч оны 12-р сарын 18-нд НҮБ-ын Ерөнхий Ассамблейгаас Олон улсын залуучуудын жилийн тухай тогтоолыг батлан энэ сарын 12-нд нээлтээ хийж “Хамтын ойлголцол ба харилцаа” сэдвийн дор “Бидний жил, бидний дуу хоолой” уриатайгаар тэмдэглэхээр болжээ.

Б.Мандах