“Дэлхийн хуримтлалын өдөр 2022” аяны нээлттэй өдөрлөг 2022 оны аравдугаар сарын 30-ны Ням гаригийн 11:00-16:00 цагийн хооронд "Blue Sky" зочид буудлын гуравдугаар давхарт болно. Зохион байгуулагчид иргэн таныг энэхүү өдөрлөгт хүрэлцэн ирж хуримтлал, санхүүгийн боловсролын тухай лекц, сонирхолтой хөтөлбөрийг үзэж сонирхон, банкуудын бүтээгдэхүүн, үйлчилгээг авахыг урьж байна.

Дэлхий даяар хуримтлалыг дэмжиж, ач холбогдлыг нь таниулан, сурталчлах зорилготой энэхүү аянд Монгол Улс 2017 онд нэгдэн орж, тэмээг үндэсний бэлгэ тэмдгээ болгосон. Үүнээс хойш жил бүрийн аравдугаар сарыг банкны салбарын хэмжээнд хуримтлалын сар болгон тэмдэглэн өнгөрүүлэх уламжлал тогтсон билээ.

Олон улсад “Дэлхийн хуримтлалын өдөр”-ийг анх 1924 оны аравдугаар сарын 31-ний өдөр Италийн Милан хотод зохион байгуулагдсан Олон улсын хадгаламжийн банкны анхны чуулганы үеэр санаачилж байжээ.

Тус аяныг энэ жил Монголбанк, Монголын банкны холбоо, Хадгаламжийн даатгалын корпораци, ХБНГУ-ын “Шпаркассэ” банкны Монгол дахь сан, арилжааны банкууд болон бусад холбогдох байгууллагууд хамтран “Ирээдүйнхээ төлөө хуримтлуулцгаая” гэсэн уриан дор тэмдэглэн өнгөрүүлж байна.

Аяны зорилго нь хуримтлалын ач холбогдлыг таниулах, хуримтлалтай иргэдийн тоог нэмэгдүүлэх, үндэсний хуримтлалын бэлгэ тэмдгийг сурталчлах, арилжааны банкуудын хадгаламжийн бүтээгдэхүүн, үйлчилгээг танилцуулах, улмаар иргэдийг санхүүгийн сахилга баттай болгох, санхүүгийн боловсролыг дээшлүүлэхэд оршиж байгаа аж.

Б.ЖАРГАЛ