Аргентины шигшээ багийн ахлагч Лионель Месси ирэх сар Катар улсад эхлэх хөлбөмбөгийн ДАШТ-д түрүүлэх хамгийн өндөр магадлалтай багуудаар Франц болон Бразилыг нэрлэлээ. Өдгөө 35 настай, сүүлийн дэлхийн аваргадаа оролцож магадгүй Мессигийн хэлснээр Бразил, Герман, Франц, Англи, Испани гэсэн хүчирхэг өрсөлдөгчид байгаа ч тэдэн дотроос Франц, Бразилын багууд алтан дагиныг өргөх өндөр боломжтой гэнэ.

Тэрбээр “DIRECTV Sports”-д өгсөн ярилцлагадаа “Бүх баг л гайхалтай. Гэхдээ би сонгох хэрэгтэй болвол Бразил, Францыг дэлхийн аваргад түрүүлэх гол тоглогчид гэж хэлнэ. Энэ хоёрын одоо бүрэлдээд байгаа бүрэлдэхүүн нь удаан хугацаанд хамт тоглосон, бие биенээ ойлгодог. Франц өнгөрсөн Европын аваргад муу тоглосон ч тоглогчид нь гайхалтай. Тэдний арга барил ойлгомжтой, дасгалжуулагч нь ч сайн. Бразил бас ялгаагүй” гэжээ.

Месси шигшээ багаа дэлхийн аваргад түрүүлэх фаворит гэж нэрлэсэнгүй. Гэхдээ дасгалжуулагч Лионель Скалонигийн залуус 35 тоглолт дараалан нэг ч тоглолтод ялагдаагүй бөгөөд өнгөрсөн жил л гэхэд тивийнхээ аваргад Бразилыг хожин түрүүлсэн билээ.

Харамсалтай нь Аргентины гол тоглогчид болох Паоло Дибала, Анхель ди Мариа нар гэмтэл аваад байна. Скалони ч Европт ид хаваа гайхуулж, тамирчдаа аравдугаар сард болгоомжтой тоглож, бэртэл гэмтлээс хол байхыг захижээ.