Монгол Улс НҮБ-ын Хүний эрхийн зөвлөлийн гишүүний сонгуульд нэрээ дэвшүүлж, нэг санал авч унасан тухай мэдээлэл цахим хуудаст гарсан. Энэ талаар Гадаад харилцааны яамнаас дараах тайлбарыг өгөв.

Гадаад харилцааны яамны олон талт хамтын ажиллагааны газрын захирлын албаны үүргийг түр орлон гүйцэтгэгч Б.Мандхай:

-Монгол Улс НҮБ-ын Хүний эрхийн зөвлөлийн гишүүний сонгуульд нэрээ дэвшүүлж, санал аваагүй гэж үнэн үү?

-НҮБ-ын Хүний эрхийн зөвлөл (ХЭЗ)-ийн 2023-2025 оны гишүүний сонгууль энэ оны аравдугаар сарын 11-ний өдөр Нью-Йорк хотод болсон. Энэ удаагийн сонгуульд бүс нутгийн 5 бүлгээс нийт 17 улс нэрээ дэвшүүлж, 14 суудлын төлөө өрсөлдсөн. Монгол Улсын харьяалагддаг Ази, Номхон далайн орнуудын бүлгээс Бангладеш 160, Мальдив 154, Вьетнам 145, Киргиз 126 санал авч сонгогдсон. Африкийн орнуудын бүлгээс Өмнөд Африк 182, Алжир 178, Марокко 178, Судан 157,  Зүүн Европын орнуудын бүлгээс Гүрж 178, Румын 176, Латин Америк, Карибын орнуудын бүлгээс Чили 144, Коста Рика 134, Баруун Европын болон бусад орнуудын бүлгээс Бельги 169, Герман 167 улсын санал тус тус авч сонгогдсон.

 НҮБ-ын Хүний эрхийн зөвлөлийн 2023-2025 оны гишүүний сонгуульд Монгол Улс нэрээ дэвшүүлээгүй.

-Өмнө нь энэ сонгуульд Монгол Улс нэрээ дэвшүүлж байсан уу?

-Монгол Улс 2015 онд болсон НҮБ-ын ХЭЗ-ийн 2016-2018 оны гишүүний сонгуульд нэрээ дэвшүүлж, НҮБ-ын гишүүн 192 улсаас 172 улсынх нь саналыг авч сонгогдон, гурван жилийн хугацаанд амжилттай ажилласан.

-НҮБ-ын Хүний эрхийн зөвлөлийн сонгуулийн санал хураалт ямар хэлбэрээр явагддаг вэ?

–НҮБ, олон улсын бусад байгууллагын сонгуулийг нууц санал хураалтаар явуулдаг. НҮБ-ын ХЭЗ-ийн энэ удаагийн сонгуулийг ч энэ зарчмын дагуу нууц санал хураалтаар явуулсан.

НҮБ-ын гишүүн улс аливаа сонгуульд санал өгөхдөө нэр дэвшсэн аль нэг улсыг дэмжихгүй, санал нийлэхгүй байгаа бол нэрээ дэвшүүлээгүй өөр нэг улсын нэрийг саналын хуудаст тэмдэглэх тохиолдол гардаг.

Энэ эрх нь гишүүн улсад нээлттэй байдаг.