ОУВС-гийн ажлын хэсгийн гишүүд өнгөрсөн сард Монгол Улсын эдийн засаг 2023 онд дөрвөн хувиар өсөх төлөвтэй ч инфляцийн дарамт, нийлүүлэлтийн саатал зэрэг гадаад хүчин зүйлс өсөлтөд нөлөөлөх эрсдэлтэйг анхааруулсан. Тус сан Монгол Улс төсвийн алдагдлаа бууруулахгүй бол бодлогын хүүг цаашид өсгөхөөс өөр аргагүй болох учраас төсвийн шинжтэй үйл ажиллагааг зогсоох шаардлагатай гэж үзжээ.

Дэлхийн банк Монгол Улсын эдийн засгийн өсөлтийн төсөөллийг 2022 онд 2.5 хувь, 2023 онд 5.5 хувь байна гэж тооцоолж, хэд хэдэн эрсдэл бийг онцолсон байна. Дэлхийн банкны Ахлах эдийн засагч Хосе Луис Диаз Санчес "Bloomberg"-т өгсөн ярилцлагадаа,

Монголд инфляци урт хугацаанд өндөр түвшинд байж, цаашид эдийн засгийн өсөлт сулрах төлөвтэй байгааг анхааруулжээ.

Үүний зэрэгцээ Монгол Улсын гадаад төлбөр тасалдахад хүрч болзошгүй байдал ажиглагдаж буй тул Засгийн газар ойрын хугацаанд ханшийг илүү уян хатан болгох хэрэгтэйг зөвлөжээ. Эс бөгөөс эдийн засагт инфляцийн дарамт, гадаад валютаар нэрлэгдсэн бондын үнэлгээг нэмэгдүүлэх эрсдэл дагуулж мэдэхийг хэлсэн байна.

Мөн томоохон дэд бүтцийн төслүүдийг хэрэгжүүлэхэд их хэмжээний импортын бараа, бүтээгдэхүүн шаардагдаж, импортын хэрэгцээ нэмэгдсэнээр төлбөрийн тэнцлийн дарамт нэмэгдэнэ гэсэн богино хугацааны төсөөлөлтэй байгаагаа мэдэгдэв.

Ялангуяа ойрын хугацаанд төлбөрийн тэнцлийн дарамтыг бууруулж, цаашид илүү тогтвортой болгох хэрэгтэй. Иймд Монгол Улсын Засгийн газар бодлого, хууль эрх зүйн орчныг сайжруулах замаар реформ хийж, худалдаа, гадаадын шууд хөрөнгө оруулалтыг нэмэгдүүлэх арга хэмжээ авах хэрэгтэйг тодотгожээ.

Монголд нэг талд Төв банкны мөнгөний бодлого чангарч байхад нөгөө талд төсвийн тэлэх бодлого үргэлжилж байгаа нь инфляцийн дарамтыг улам нэмж байгаа бөгөөд энэ нь эсрэг үр дагавар авчирч магадгүйг анхааруулсан байна.